فلیگ شپ اور العزیزیہ فیصلوں کے خلاف نیب اور نواز شریف کی درخواستوں پر اعتراضات عائد

نیب پراسیکیوٹر اور نواز شریف کے وکیل اپیلوں اور درخواست پر اعتراضات دور کرنے کل ہائی کورٹ جائیں گے (فوٹو: فائل)

---

العزیزیہ اور فلیگ شپ ریفرنسز کے فیصلوں کے خلاف نیب کی اپیل اور نواز شریف کی سزا معطلی کی درخواست پر اعتراضات عائد کردیئے گئے۔

ایکسپریس نیوز کے مطابق سابق وزیراعظم نواز شریف نے اپنے وکلا کے ذریعے اسلام آباد ہائی کورٹ میں العزیزیہ ریفرنس کے فیصلے میں سنائی گئی سزا معطل کرنے کے لیے درخواست دائر کرتے ہوئے استدعا کی تھی کہ اصل اپیل کا فیصلہ آنے تک سزا معطل کی جائے۔

یہ پڑھیں: اسلام آباد ہائی کورٹ میں سزا معطلی کی درخواست دائر

نیب کی جانب سے بھی فلیگ شپ ریفرنس میں نواز شریف کی بریت کے فیصلے کو چیلنج اور العزیزیہ ریفرنس میں نواز شریف کی سزا بڑھانے کی اپیل دائر کی گئی تھی، دونوں ریفرنسز اسلام آباد ہائی کورٹ میں اپیلیں دائر کی گئیں۔

یہ پڑھیں: نواز شریف کے خلاف دونوں ریفرنس کے فیصلے چیلنج

تاہم اسلام آباد ہائی کورٹ کی ویب سائٹ کے مطابق العزیزیہ اور فلیگ شپ ریفرنسز کے فیصلے کے خلاف نیب کی اپیلوں اور نواز شریف کی سزا معطلی کی درخواست پر اعتراضات لگا دیئے گئے ہیں۔اطلاعات ہیں کہ رجسٹرار ہائی کورٹ نے نیب کی اپیلوں اور نواز شریف کی سزا معطلی کی درخواست پر تکنیکی نوعیت کے اعتراضات عائد کیے ہیں۔

ذرائع کے مطابق رجسٹرار ہائی کورٹ کے اعتراضات دور کرنے کے لیے نیب پراسیکیوٹر اور نواز شریف کے وکیل اسلام آباد ہائی کورٹ جائیں گے۔