ٹیکس گوشوارے جمع نہ کرانیوالے 12 ہزار امرا کو نوٹس جاری کرنے کا فیصلہ

گوشوارے جمع نہ کرانے والی193کمپنیوں کیخلاف بھی کارروائی کی جائیگی، نگرانی کیلیے ہیڈکوارٹزر میں خصوصی سیل قائم۔ فوٹو: فائل

---

فیڈرل بورڈ آف ریونیو(ایف بی آر) نے 24 لاکھ 99 ہزار39 نان فائلرز میں سے 22 ہزار نان فائلرز کو نوٹس جاری کرنے کا فیصلہ کیا ہے۔

پہلے مرحلے ان 12 ہزار امیر ترین لوگوں کو نوٹس جاری کیے جائیں گے جو پوش علاقوں میں مقیم ہیں اور ایک سے زائد بینک اکاؤنٹس رکھتے ہیں جبکہ انکے بچے ملکی و غیر ملکی مہنگے ترین تعلیمی اداروں میں تعلیم حاصل کرتے ہیں اور دوسرے مرحلے میں مزید 10 ہزار افراد کو نوٹس جاری کیے جائیں گے۔ اس ضمن میں ایف بی آر کے سینئر افسر نے بتایا کہ 22 ہزار سے زائد نان فائلرز کو نوٹسز ریجنل ٹیکس آفسز اور ایل ٹی یوز کی طرف سے جاری کیے جائیں گے، ملک بھر میں قائم 18 ریجنل ٹیکس آفسز کو نان فائلرز کے بارے میں مکمل ڈیٹا و دستاویزی معلومات پر مبنی ثبوتوں کی سی ڈیز بھجوائی جائیں گی جس میں ان نان فائلرز کے نام پتے سمیت دیگر تمام معلومات دی گئی ہیں۔

حکام نے بتایا کہ آر ٹی اوز کی طرف سے نان فائلرز کو جاری کردہ نوٹس کا 30 دن میں جواب دینے کی مہلت دی جائے گی جبکہ نان فائلرز کے خلاف 90 سے 120 دنوں کے دوران کارروائی مکمل کی جائیگی۔ حکام نے بتایا کہ نان فائلرز کے خلاف کارروائی کی مانیٹرنگ کے لیے ایف بی آر ہیڈ کوارٹرز میں چیف آپریشن کی سربراہی میں خصوصی سیل قائم کیا گیا ہے اور ملک بھر کے آر ٹی اوز اور ایل ٹی یوز نان فائلرز سے ٹیکس وصولی اور ریٹرن وصولی کے حوالے سے ہفتہ وار بنیادوں پر ایف بی آرکو رپورٹ پیش کیا کریں گے۔ حکام نے بتایا کہ ملک کی 193 کمپنیاں بھی انکم ٹیکس گوشوارے جمع نہیں کرارہی ہیں۔



انہوں نے بتایا کہ ان نان فائلرز کو موقع دیا جائیگا کہ وہ انکم ٹیکس گوشوارے اوراپنے ذمے واجب الادا ٹیکس واجبات جمع کرائیں تاہم جو کمپلائنس نہیں کریں گے انکے خلاف کارروائی کی جائے گی اور یہ کارروائی 120 دن میں مکمل کی جائے گی اور تمام آر ٹی اوز کو پابند بنایا جائیگا کہ وہ نان فائلرز کی طرف سے جمع کرائے جانے والے انکم ٹیکس گوشواروں اور ٹیکس واجبات کی ہفتہ وار بنیادوں پر ایف بی آر ہیڈ کوارٹرز کو رپورٹ بھجوائیں اور اس آپریشن کی مانیٹرنگ کے لیے ایف بی آر کی چیف آپریشن کی سربراہی میں ایف بی آر ہیڈ کوارٹزر میں خصوصی سیل بھی قائم کیا گیا ہے جو اس عمل کی نہ صرف مانیٹرنگ کرے گا بلکہ ایل ٹی یوز اور آر ٹی اوز کے دورے بھی کریگا۔

حکام نے بتایا کہ آر ٹی او ون کراچی میں 3 لاکھ 3 ہزار 63 نان فائلرز، آر ٹی او ٹو کراچی میں 42 ہزار 10 نان فائلرز،آر ٹی او تھری کراچی میں 2 لاکھ 93 ہزار 251 نان فائلرز، آر ٹی او اسلام آباد میں 1 لاکھ 22 ہزار72 نان فائلرز، آر ٹی او راولپنڈی کی طرف سے 2 لاکھ 7 ہزار 6 نان فائلرز، آر ٹی او لاہور کی طرف سے 2 لاکھ 69 ہزار549 نان فائلرز، آر ٹی او فیصل آباد کی طرف سے 1 لاکھ 86 ہزار136 نان فائلرز، آر ٹی او ملتان کی طرف سے 1 لاکھ 68 ہزار 8 نان فائلرز، آر ٹی او سیالکوٹ کی طرف سے 1 لاکھ 1 ہزار 938 نان فائلرز اور آر ٹی او پشاور کی طرف سے 1 لاکھ 93 ہزار598 نان فائلر کو نوٹس جاری کرنا شروع کیے گئے ہیں، اس کے علاوہ لارج ٹیکس پیئر یونٹ (ایل ٹی یو) لاہور کی طرف سے 32 کمپنیوں کو، ایل ٹی یو کراچی کی طرف سے 103 کمپنیوں کو اور ایل ٹی یو اسلام آباد کی طرف سے 58 کمپنیوں کو نوٹس جاری کیے جارہے ہیں۔