ایران کیلئے کوئی مشکلات کھڑی نہیں کرنا چاہتے، وزیر خارجہ

ویب ڈیسک  پير 18 فروری 2019
ہم ایران کی خودمختاری کا احترام کرتے ہیں اور امید ہے کہ ایران بھی ہماری خودمختاری کا احترام کرے گا، وزیر خارجہ فوٹو:فائل

ہم ایران کی خودمختاری کا احترام کرتے ہیں اور امید ہے کہ ایران بھی ہماری خودمختاری کا احترام کرے گا، وزیر خارجہ فوٹو:فائل

 اسلام آباد: وزیر خارجہ شاہ محمود قریشی نے کہا ہے کہ ایران ہمارا پڑوسی ملک ہے جس کیلئے کوئی مشکلات کھڑی نہیں کرنا چاہتے۔

سعودی وزیر خارجہ عادل الجبیر کے ہمراہ مشترکہ پریس کانفرنس کرتے ہوئے وزیر خارجہ شاہ محمود قریشی نے کہا کہ سعودی عرب نے ویزا فیس میں کمی کا پاکستان کا دیرینہ مطالبہ مان لیا ہے اور ویزا فیس کم کردی ہے، منصوبوں پر عمل درآمد کے لیے جوائنٹ ورکنگ گروپ بنائے گئے ہیں جو ہر تین ماہ بعد ملاقات کریں گے، ہم نے سپریم رابطہ کونسل کے قیام کا بھی فیصلہ کیا ہے جس کا مقصد مفاہمتی یاد داشتوں پر عملدرآمد کو یقینی بنانا ہے۔

یہ بھی پڑھیں: پاکستان کو بھیک نہیں دے رہے بلکہ سرمایہ کاری کررہے ہیں، سعودی وزیرخارجہ

پاکستان کے خلاف ایرانی الزام تراشیوں سے متعلق سوال کے جواب میں شاہ محمود قریشی نے کہا کہ ایرانی وزیر خارجہ سے بات کی ہے اور حالیہ حملے پر افسوس کا اظہار کیا، یہ حملے ناقابل قبول ہیں جس کی ہم مذمت کرتے ہیں، ایران ہمارا پڑوسی ملک ہے جس کے لیے ہم کوئی مشکلات کھڑی نہیں کرنا چاہتے۔

یہ بھی پڑھیں: ایران میں پاسداران انقلاب پر خود کش حملے میں ہلاکتوں کی تعداد41 ہوگئی

وزیر خارجہ نے کہا کہ ہم ایران کی خودمختاری کا احترام کرتے ہیں اور امید ہے کہ ایران بھی ہماری خودمختاری کا احترام کرے گا، اگر انہیں کوئی مسائل ہیں تو اس پر بات چیت ہوسکتی ہے اور اگر حملے سے متعلق کوئی ثبوت ہیں تو فراہم کریں ہم تعاون کریں گے، ہم نے پہلے بھی ان کے ساتھ تعاون کیا ہے اور ان کی مدد کی ہے اور آئندہ بھی کرتے رہیں گے۔

واضح رہے کہ 14 فروری کو ایرانی پاسداران انقلاب فورس پر حملے میں 41 سیکیورٹی اہلکار ہلاک ہو گئے تھے جبکہ پاسدارانِ انقلاب کے کمانڈر نے پاکستان پر حملے میں ملوث ہونے کا الزام لگایا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔