سیکریٹری الیکشن کمیشن کی قبل ازوقت ریٹائرمنٹ قیاس آرائی نکلی

اشتیاق احمد خان نے مصروف دن گزارا، انکی توسیعی مدت اکتوبر 2013 میں مکمل ہوگی فوٹو ایکسپریس

---

سیکریٹری الیکشن کمیشن اشتیاق احمد خان نے اپنی قبل از وقت ریٹائرمنٹ کے بارے میں قیاس آرائیوں کی نفی کرتے ہوئے پیر کوالیکشن کمیشن کے اعلیٰ سطح کے اجلاس میں ملک میں بلدیاتی انتخابات اور ضمنی انتخابات کے حوالے سے تفصیلی بریفنگ لے کر پیغام دیدیا کہ وہ اپنی 2 سالہ توسیعی مدت پوری کریں گے۔

پیر کو الیکشن کمیشن کے ذرائع کے مطابق سیکریٹری نے پیرکوتمام افسران کا اجلاس بلا کر ان سے ادارے کی کارکردگی اور رواں سال کے پروگراموں پر تفصیلی بریفنگ دی اور میڈیا رپورٹس سے پیدا ہو نے والے اس تاثرکو زائل کرنے کی کوشش کی کہ سابق چیف الیکشن کمشنرفخر الدین جی ابراہیم کے استعفیٰ کے بعد وہ بھی قبل از وقت ریٹائرمنٹ لے رہے ہیں۔



ذرائع کے مطابق وہ پراعتماد نظر آ رہے تھے اور ایسا دکھائی نہیں دے رہا تھا کہ وہ ادارے کو قبل وقت چھوڑنے کا ارادہ رکھتے ہیں۔ واضح رہے کہ اشتیاق احمد خان کی مدت ملازمت ان کی عمر 60 سال ہو نے پراکتوبر 2011 میں مکمل ہو گئی تھی تاہم اس وقت کے وزیر اعظم سید یوسف رضا گیلانی نے ان کی مدت ملازمت میں2 سال کی توسیع دے کر انھیں کام جاری رکھنے کی ہدایت کی تھی ان کی 2 سالہ توسیعی مدت اکتوبر 2013 کے آخری ہفتے میں مکمل ہو گی۔