شام میں بمباری سے منہدم عمارت میں نومولود بہن کو بچانے والی 5 سالہ بچی جاں بحق

نومولود بہن کو بچانے کی کوشش کے دوران عمارت دوبارہ گر گئی۔ فوٹو : ٹویٹر

---

شام میں فضائی حملے میں تباہ ہونے والے ایک گھر کے ملبے تلے دبی نومولود بچی کو نیچے گرنے سے روکنے والی 5 سالہ بہن زخموں کی تاب نہ لاتے ہوئے اسپتال میں دم توڑ گئی۔

عالمی خبر رساں ادارے کے مطابق سوشل میڈیا پر وائرل ہونے والی اس دل خراش تصویر نے شام کی جنگ میں تباہی اور وہاں جنم لینے والے انسانی المیے کی جانب عالمی مبذول کرائی ہے۔ اندوہناک تصویر میں فضائی حملوں کے بعد کثیر المنزلہ عمارت کے ملبے میں پانچ سالہ بچی اپنی گرتی ہوئی نومولود بہن کو قمیص سے پکڑ کر بچا رہی ہے۔

واقعے کی کوریج کرنے والے فوٹو گرافر نے بتایا کہ 5 سالہ بچی نومولود بہن کو اپنی جانب کھینچ ہی رہی تھی اور اس کا غمزدہ باپ اپنی بچیوں کو بچانے کےلیے آگے بڑھ رہا تھا کہ عمارت مزید نیچے گر گئی اور بچیاں ملبے تلے دب گئیں۔ سفید ہیلمٹ والے رضاکاروں نے بچیوں کو اسپتال منتقل کیا۔

5-year-old Syrian girl dies trying to save her baby sisters from the rubble of their bombed home. pic.twitter.com/TZWAnnTG1X

- Al Jazeera English (@AJEnglish) July 25, 2019

پانچ سالہ ریحام اسپتال میں دوران علاج دم توڑ گئی جب کہ اس کی نومولود بہن اب بھی انتہائی نگہداشت کے وارڈ میں زیر علاج ہے۔ اس کی والدہ ہولناک واقعے میں جاں بحق ہوگئی ہیں اور باپ امجد العبداللہ زخمی حالت میں زیر علاج ہیں۔

واضح رہے کہ داعش جنگجوؤں کے زیر قبضہ شہر مرات النعمان پر مبینہ طور پر اتحادی افواج کے جنگی طیاروں نے بمباری کی تھی جس کے نتیجے میں 31 شہری جاں بحق ہوئے جن میں 3 خاندانوں کے 10 افراد بھی شامل تھے۔