آصف زرداری خراب طبیعت کے باعث اڈیالہ جیل سے پمز اسپتال منتقل

پمز اسپتال میں سابق صدر کے مختلف ٹیسٹ کیے جائیں گے۔ فوٹو : فائل

---

سابق صدر آصف زرداری کو خراب طبیعت کے باعث اڈیالہ جیل سے پمز اسپتال منتقل کردیا گیا ہے۔

سابق صدر اور پیپلز پارٹی کے شریک چیئرمین آصف زرداری کو معالجین کی رپورٹس کی روشنی میں اڈیالہ جیل سے پمز اسپتال منتقل کردیا گیا ہے جہاں شعبہ امراض قلب، نیورولوجی، آرتھوپیڈک اور شعبہ میڈیسن کے ڈاکٹروں نے سابق صدر کا معائنہ کیا، اسپتال ذرائع کے مطابق ڈاکٹروں نے سابق صدر کے شوگر اور بلڈ پریشر کے ٹیسٹ کیے جب کہ ان کی فیزیوتھراپی بھی کی گئی جس کے بعد سابق صدر کو پمز کے کارڈریک سینڑ میں داخل کردیا گیا ہے، کلینیکل ٹیسٹ رپورٹس کی بنیاد پر آصف زرداری کے مزید علاج کا فیصلہ کیا جائے گا۔

ذرائع کا کہنا ہے کہ آصف زرداری کے گھر سے ان کے زیر استعمال چیزیں اور ادویات کاڈریک سینڑ پہنچا دی گئی ہیں، سابق صدر کے کپڑے اور دیگر چیزیں ان کے ملازمین لے کر کاڈریک سینڑ پہنچے جب کہ آصف زرداری کی پولیٹیکل سیکرٹری رخسانہ بنگش بھی پمز پہنچ گئی ہیں۔

سابق صدر کی اسپتال منتقلی پر پمز اسپتال میں سیکیورٹی ہائی الرٹ کرکے پولیس کی بھاری نفری کو تعینات کیا گیا ہے جب کہ سابق صدر کو کارڈیک سینٹر میں وی آئی پی سیکیورٹی فراہم کی جائے گی۔

واضح رہے کہ پمز اسپتال کے سینیئر ڈاکٹروں پر مشتمل ٹیم نے وزارتِ داخلہ کی درخواست پر پیپلز پارٹی کے شریک چیئرمین کا اڈیالہ جیل میں ابتدائی طبی معائنہ کیا جس کے بعد انھیں فوری طور پر اسپتال منتقل کرنے کا فیصلہ کیا گیا تھا۔