’ٹیک آف‘ سے پہلے ہی بیٹنگ لائن کے پرخچے اُڑ گئے

یونس، حفیظ، خرم سمیت دیگر پلیئرز کریز کو چھو کر لوٹ گئے، ذوالفقار نے6 وکٹیں لے کرچیف منسٹر الیون کو 90 پر ڈھیر کیا، چیئرمین الیون کے134 پر 3 پلیئرز رخصت۔ فوٹو: فائل

---

جنوبی افریقہ سے سیریز کی تیاریوں کے بلند بانگ دعوؤں کا پول کھل گیا، 'ٹیک آف' سے پہلے ہی بیٹنگ لائن کے پرخچے اڑگئے۔

سہ روزہ پریکٹس میچ کے ابتدائی روز ہی 13 وکٹیں گرگئیں، بڑے کھلاڑیوں کے ہوم گراؤنڈ پر ہی درشن چھوٹے نکلے، یونس خان، محمد حفیظ، خرم منظور، فیصل اقبال، احمد شہزاد، عدنان اکمل سب کریز کو چھو کر واپس لوٹ گئے، ذوالفقار بابر نے 6 وکٹیں لے کر چیف منسٹر الیون کو 90 رنز پر ڈھیر کیا، دن کے اختتام تک پاکستان کرکٹ بورڈ چیئرمین الیون کے 134 پر ٹاپ 3 بیٹسمین واپس لوٹ گئے۔

تفصیلات کے مطابق زمبابوے جیسی ٹیم سے شکست کے بعد وطن واپس لوٹنے والی ٹیم نے کئی تاویلیں تراشیں اور پھر نیشنل اکیڈمی میں جمع ہوکر جنوبی افریقہ کیخلاف سیریز کیلیے مشقیں شروع کیں، جب تیاریوں کی آزمائش کا وقت آیا تو بیٹسمین اپنے ہی ہوم گراؤنڈ اور موافق پچ پر فلاپ ہو گئے۔ جنوبی افریقہ سے سیریز کیلیے پی سی بی کی سلیکشن کمیٹی نے ابتدائی مرحلے میں 28 کھلاڑیوں کا اعلان کیا ہے جن کے درمیان گذشتہ روز تین روزہ پریکٹس میچ کا آغاز ہوا۔



ماضی کی طرح اس میچ میں بھی بیٹسمین غلط شاٹس کھیل کر اپنی وکٹیں گنواتے رہے، دن بھر میں مجموعی طور پر 13 وکٹیں گریں۔یونس خان کی قیادت میں چیف منسٹر الیون نے بیٹنگ کا آغاز کیا اور انتہائی مایوس کن کھیل پیش کرتے ہوئے اپنی تمام وکٹیں صرف 90 رنز پر گنوا دیں۔ میچ میں بڑے نام ایک بار پھر بُری طرح ناکام ہوئے، یونس خود 9 رنز بنا کر ذوالفقار بابر کی گیند پر بولڈ ہوئے، اوپنر خرم منظور کھاتہ کھولے بغیر پویلین لوٹے، عدنان اکمل اور عبدالرحمان 2،2 رنز ہی بنا سکے، شان مسعود29، فیصل اقبال 20 اور وہاب ریاض 17 رنز بنانے میں کامیاب رہے، اسپنر ذوالفقار بابر نے 12.2 اوورز میں صرف22 رنز دیکر6کھلاڑیوں کو پویلین کا راستہ دکھایا، محمد عرفان ، احسان عادل اور اعزاز چیمہ نے ایک ایک کھلاڑی کو آؤٹ کیا۔

جواب میں چیئرمین پی سی بی الیون نے تین وکٹ پر 134 رنز بنائے، اظہر علی 48 اور اسد شفیق 15 رنز کے ساتھ کریز پر موجود ہیں۔ سال بھر کے پانچ ٹیسٹ میچزکی دس اننگز میں صرف 102 رنز بنانے والے ٹوئنٹی20 کپتان محمد حفیظ کو ایک بار پھر موقع فراہم کیا گیا لیکن وہ موزوں کنڈیشنز میں بھی بڑااسکور کرنے میں کامیاب نہ ہو سکے اور 22 رنز بنا کر عبدالرحمان کی گیند پر وکٹ کیپر عدنان اکمل کو کیچ دے بیٹھے۔عمر امین 8 کے اسکور پر رن آؤٹ ہوئے، احمد شہزاد 37 ر نز بنانے میں کامیاب رہے۔ چیف منسٹر الیون کی طرف سے راحت علی اور عبدالرحمان نے ایک ایک کھلاڑی کو آؤٹ کیا۔