آصف علی زرداری کی طبی بنیادوں پردرخواست ضمانت سماعت کیلئے مقرر

ویب ڈیسک  منگل 3 دسمبر 2019
آصف زرداری کی میڈیکل رپورٹس بھی درخواست کے ساتھ منسلک : فوٹو : فائل

آصف زرداری کی میڈیکل رپورٹس بھی درخواست کے ساتھ منسلک : فوٹو : فائل

سابق صدرآصف علی زرداری اور ان کی بہن فریال تالپور نے اسلام آباد ہائیکورٹ میں درخواست ضمانت دائرکردی۔

ایکسپریس نیوزکے مطابق سابق صدر آصف علی زرداری نے میگا منی لانڈرنگ اور پارک لین کیسز میں اپنے وکیل فاروق ایچ نائیک کے ذریعے طبی بنیادوں پردرخواست ضمانت دائرکردی جس میں نیب اوراحتساب عدالت نمبردوکوفریق بنایا گیا ہے۔

آصف علی زرداری نے موقف اختیار کیا ہے کہ مجھے دل کی بیماری لاحق ہے اور تین اسٹنٹ بھی ڈالے جاچکے ہیں، شوگر کا مرض ہے اور شوگر لیول کنٹرول کرنے کے لیے مستقل علاج کی ضرورت ہے۔

آصف زرداری نے میڈیکل رپورٹس درخواست کے ساتھ منسلک کرکے استدعا کی کہ انہیں متعدد بیماریاں لاحق ہیں، لہذا علاج کے لیے ضمانت منظور کی جائے۔

فریال تالپور نے درخواست ضمانت میں کہا کہ اسپیشل بچی کی والدہ ہوں، اس کی دیکھ بھال کے لیے ٹرائل مکمل ہونے تک ضمانت منظور کی جائے۔

اسلام آباد ہائی کورٹ کے چیف جسٹس اطہر من اللہ نے آصف زرداری اور فریال تالپور کی درخواستیں کل سماعت کے لیے مقرر کرتے ہوئے دو رکنی اسپیشل بینچ تشکیل دے دیا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔