کراچی پورٹ 16720 کلوگرام پوست کے بیجوں کی اسمگلنگ ناکام

ممنوعہ پوست کے بیج کی اسمگلنگ میں ملوث عناصر کے خلاف قانونی کارروائی کا آغاز کردیا گیا ہے, کلکٹرکسٹمز ایکسپورٹ . فوٹو وکی پیڈیا

---

محکمہ ایکسپورٹ کلکٹریٹ اور ڈائریکٹوریٹ کسٹمز انٹیلی جینس اینڈ انویسٹی گیشن کراچی نے ٹیکسٹائل گڈز کی آڑ میں16720 کلوگرام پوست کے بیجوں کی 344 بوریاں اسمگل کرنے کی کوشش ناکام بنادی۔

کلکٹرکسٹمز ایکسپورٹ کلکٹریٹ واصف میمن نے ''ایکسپریس'' کو بتایا کہ ٹیکسٹائل گڈز کا مذکورہ کنسائمنٹ ہالینڈ کے لیے برآمد کیا جارہا تھا تاہم ایک خفیہ اطلاع پر کسٹمز ایکسپورٹ کلکٹریٹ نے کنٹینرنمبرCBHU-8687739جو کہ 40 فٹ کا حامل ہے، پر چھاپہ مارکر جب تفصیلی ایگزامنیشن کی تو انکشاف ہوا کہ کنسائمنٹ کی آڑ میں پاکستان سے وسیع پیمانے پر پوست کے بیج اسمگل کیے جارہے ہیں جن کی برآمد ممنوع ہے۔

ذرائع نے بتایا کہ اس برآمدی کنسائمنٹ کے لیے داخل کرائے جانے والے گڈز ڈیکلئریشن نمبر14872 اور 14874 میں ٹیکسٹائل مصنوعات ظاہرکی گئی تھیں جوکہ 23 اکتوبر2013 کو داخل کرائی گئی تھی۔ ان کنسائمنٹس کی کسٹمزکلیئرنس کی ذمے داری ندیم انٹرنیشنل نامی کمپنی کی تھی جبکہ میسرزرستم ٹاولز پرائیویٹ لمیٹڈاور فرینڈز ایکسپورٹ پرائیویٹ لمیٹڈ مذکورہ کنسائمنٹ کی برآمدکنندہ کمپنیاں ہیں۔ کلکٹرکسٹمز ایکسپورٹ نے بتایا کہ کنسائمنٹس کی آڑ میں ممنوعہ پوست کے بیج کی اسمگلنگ میں ملوث عناصر کے خلاف قانونی کارروائی کا آغاز کردیا گیا ہے اور ملوث کمپنیوں کے خلاف ایف آئی آر بھی درج کرادی ہے۔