منٹوں کا سفر گھنٹوں میں، موٹرویز کئی مقامات پر بند،قومی شاہراہ پر حد نگاہ 150میٹر رہ گئی
(فوٹو: ایکسپریس/فائل)
قومی شاہراہوں پر ٹریفک سست روی کا شکار ہے منٹوں کا سفر گھنٹوں میں طے ہو رہا ہے جبکہ موٹر ویز کئی مقامات پر بند کر دی گئی ہیں۔ ترجمان موٹر وے پولیس کے مطابق ملتان موٹر وے ایم تھری، لاہور تا عبدالحکیم شدید دھند کے باعث بند ہے۔ خانیوال تا ملتان موٹر وے کو شدید دھند کے باعث بند کر دیا گیا ہے۔
قومی شاہراہ پر پتوکی، رینالہ خورد، اوکاڑہ ، ساہیوال ، ہڑپہ، چیچہ وطنی، میاں چنوں ، خانیوال، ملتان ، لودھراں اور بہاولپور میں بھی دھند ہے۔ قومی شاہراہ پر حد نگاہ 30 سے150میٹر رہ گئی ہے۔
دریں اثنا بالائی اور شمالی علاقوں میں برف باری نے لاہور سمیت پنجاب اور اس کے میدانی علاقوں میں سردی کی شدت میں اضافہ کردیا ہے، محکمہ موسمیات کے مطابق لاہور میں سردی کا پانچ سالہ ریکارڈ ٹوٹ گیا ہے۔
