مسجد نبوی اور مسجد اقصیٰ کو نمازیوں کے لیے کھول دیا گیا

مدینہ: سعودی عرب میں مسجد نبوی اور فلسطین میں مسجد اقصیٰ کو نمازیوں کے لیے کھول دیا گیا ہے۔

غیر ملکی خبر رساں ادارے کے مطابق کورونا وائرس سے بچاؤ کے لیے دنیا بھر میں دیگر مساجد کی طرح مسجد نبوی اور مسجد اقصیٰ کو بھی نمازیوں کے لیے بند کردیا گیا تھا۔

سعودی حکومت کی جانب سے لاک ڈاؤن میں نرمی کے بعد دیگر مساجد کی طرح مسجد نبوی کو بھی ڈھائی ماہ بعد نماز کی ادائیگی کے لیے کھول دیا گیا۔

Gates of Masjid Al Nabawi, Madinah are open to recieve worshipers since Fajr Salah after a closure of 2 months. pic.twitter.com/G6r1CjtwiY

— Deeba (@Deebahaani) May 31, 2020

اس موقع پر نمازیوں کا جوش وخروش دیدنی تھا اور فرزندان اسلام بڑی تعداد میں جوق در جوق نماز کی ادائیگی کے لیے مسجد نبوی آئے۔ مسجد کو گنجائش کے حساب سے 40 فیصد نمازیوں کے لیے کھولا گیا ہے۔

نماز کی ادائیگی کے وقت کورونا سے بچاؤ کی احتیاطی تدابیر کو ملحوظ خاطر رکھا گیا اور زیادہ تر نمازیوں نے ماسک پہنے تھے اور جائے نماز ساتھ لائے تھے جبکہ صف بندی میں آپس میں متعین فاصلہ بھی رکھا گیا۔

https://twitter.com/arabnewspk/status/1267007061935579137

مسجد کے دروازوں پر نمازیوں کا درجہ حرارت معلوم کرنے کے لیے خود کار خصوصی تھرمل کیمرے نصب کیے گئے ہیں جن پر طبی اہلکاروں کو مامور کیا گیا ہے۔

دوسری جانب مقبوضہ بیت المقدس میں بھی مسجد اقصیٰ کو فجر کے وقت نماز کے لیے کھول دیا گیا ہے۔ مسجد میں داخل ہوتے وقت مسلمانوں نے الله اكبر کے نعرے بلند کیے اور سجدہ شکر بجالائے۔

https://twitter.com/SaifRikiji/status/1267004565930590210