پولیس مقابلے میں نوجوان کی ہلاکت کیخلاف مشتعل افراد تھانے پہنچ گئے

اہلخانہ اور علاقہ مکینوں نے شدید غم وغصے کا اظہارکرتے ہوئے مقابلے کوجعلی قراردے کرغیرجانبداری تحقیقات کا مطالبہ کردیا۔ فوٹو : فائل

---

سائٹ ایریا میں اتوار کی شب مبینہ پولیس مقابلے کے خلاف مشتعل افراد تھانے پہنچ گئے۔

سائٹ اے پولیس نے اتوار کی شب حبیب بینک چورنگی کے قریب فائرنگ کے تبادلے میں ایک ڈاکو کو زخمی حالت میں گرفتار کرنے کا دعویٰ کیا تھا جو بعدازاں زخموں کی تاب نہ لاتے ہوئے دم توڑ گیا تھا، مقابلے میں ایک پولیس اہلکار جہانگیر بھی زخمی ہوا تھا، ہلاک ہونے والے کی شناخت سلطان نذیر کے نام سے ہوئی ہے۔

سلطان نذیر کے رشتے داروں نے میڈیا سے بات چیت کرتے ہوئے بتایا کہ وہ گارڈن کا رہائشی اور رشتے دار کے سوئم میں شرکت کے لیے گیا تھا جسے اس کے کزن نے گھر جانے کے لیے آن لائن موٹر سائیکل سروس بک کرا کر دی تھی جس پر وہ سوار ہو کر گھر کی جانب جا رہا تھا کہ جعلی پولیس مقابلے کے بھینٹ چڑھ گیا۔

سلطان جب رات تک گھر نہیں پہنچا تو اس کے کزن نے آن لائن موٹر سائیکل سروس کے رائیڈر سے اس کے موبائل فون پر رابطہ کیا تو اس نے انکشاف کیا کہ فائرنگ کا واقعہ ہوا تھا اور میں وہاں سے چلا گیا جس پر ہم سائٹ اے تھانے پہنچے تو پولیس نے مقابلہ ظاہر کیا جبکہ سلطان کو موٹر سائیکل چلانا نہیں آتی تھی۔

سائٹ اے تھانے میں مشتعل افراد کے احتجاج کی اطلاع پر ایس ایس پی کیماڑی فدا حسین جانوری نے ایس پی بلدیہ کی سربراہی میں تحقیقاتی کمیٹی قائم کر دی جو کہ 24 گھنٹے میں اپنی رپورٹ پیش کریگی۔

پولیس حکام نے لواحقین کی جانب سے احتجاج کے بعد سائٹ اے تھانے میں نوجوان سلطان نذیر کے کزن سلیم اللہ کی مدعیت میں مقدمہ نمبر 11 سال 2021 بجرم دفعہ 302/34 کے تحت درج کر کے مبینہ مقابلے میں زخمی ہونے والے جہانگیر اور شبیر کو حراست میں لے لیا۔

پولیس نے مقدمے میں انسداد دہشت گردی کی دفعہ سیون اے ٹی اے کو بھی شامل کرلیا جبکہ مقدمے میں زیر حراست دونوں پولیس اہلکاروں جہانگیر اور شبیر احمد کو نامزد کیا گیا ہے۔