عمر شریف کو بیرون ملک علاج کیلئے امریکا کا ویزا جاری ہوگیا

ویب ڈیسک  جمعرات 16 ستمبر 2021
عمرشریف جلد اپنے علاج کے لئے امریکہ روانہ ہوں گے، شہباز گل فوٹوفائل

عمرشریف جلد اپنے علاج کے لئے امریکہ روانہ ہوں گے، شہباز گل فوٹوفائل

کراچی: پاکستان کے لیجنڈ کامیڈین اور سینئر اداکار عمر شریف اور ان کے اہلخانہ کو امریکا کے ویزے جاری ہوگئے۔

معاون خصوصی ڈاکٹر شہباز گل نے کہا ہے عمرشریف صاحب اور ان کے اہلخانہ کو امریکا کے ویزے ایشو ہو گئے ہیں۔ عمرشریف جلد اپنے علاج کے لئے امریکا روانہ ہوں گے۔

شہباز گل نے مزید کہا عمرشریف کے اہلخانہ نے اس تمام پراسس میں تعاون پر وزیراعظم پاکستان کا شکریہ ادا کیا اور وزیراعظم صاحب دعاگو ہیں کہ اللہ تعالی عمر شریف صاحب کو جلد صحت یاب کرے۔

یہ بھی پڑھیں: عمر شریف کی طبیعت انتہائی ناساز، وزیراعظم سے مدد کی اپیل

واضح رہے کہ دل کے عارضے میں مبتلا عمر شریف کی طبیعت بہت زیادہ خراب ہے۔ چند روز قبل انہوں نے ایک ویڈیو پیغام کے ذریعے وزیراعظم پاکستان عمران خان سے درخواست کی تھی کہ بیرون ملک علاج  کے لیے ان کی مدد کی جائے کیونکہ ان کا علاج پاکستان میں نہیں بلکہ بیرون ملک میں ہی ممکن ہے۔

اس کے علاوہ عمر شریف کی اہلیہ زرین عمر اپنے شوہر کے علاج کے لیے حکومت سے ایئر ایمبولینس اور ویزا وغیرہ کے انتظامات کرنے کی درخواست کی تھی تاکہ عمر شریف کو علاج کے لیے بیرون ملک لے جایا جاسکے۔

یہ بھی پڑھیں: زرین عمر کا اسپتال میں عمر شریف سے کیا گیا وعدہ پورا کرنے کا عزم

عمر شریف کی درخواست پر وفاقی اور سندھ حکومت نے فوراً کارروائی کرتے ہوئے ان کے علاج کے لیے رقم جاری کرنے کا اعلان کیا اور محکمہ خزانہ کی جانب سے رقم کے اجرا کے لیے باضابطہ حکم نامہ جاری کیا گیا۔ اس کے علاوہ سندھ حکومت نے عمر شریف کے علاج کے لیے ایئر ایمبولینس کا بندوبست بھی کیا جس کے لئے 4 کروڑ روپے کی رقم محکمہ صحت کو جاری کی گئی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔