قومی ٹی 20 کرکٹ کراچی ڈولفنز نے سیالکوٹ کو ہرا کر کوارٹر فائنل میں رسائی حاصل کرلی

ناکام ٹیم 91رنز پر ڈھیر،مین آف دی میچ فواد عالم کا آل رائونڈ کھیل،لاڑکانہ بلز کی ٹائٹل کی طرف پیش قدمی رک گئی،فیصل آباد کے سعید اجمل کی 3وکٹیں۔ فوٹو: اے ایف پی/فائل

---

QUETTA: سیالکوٹ اسٹالینز کی غیر متوقع شکست نے کراچی ڈولفنز کو قومی ٹوئنٹی 20 کرکٹ ٹورنامنٹ کے کوارٹر فائنل میں پہنچا دیا۔

رن ریٹ کے معمولی فرق نے لاڑکانہ بلز کی ٹائٹل کی طرف پیش قدمی روک دی، پہلے ہی فائنل 8میں جگہ محفوظ کرنے والی شعیب ملک الیون صرف91رنز پر ڈھیر ہو گئی، فاتح ٹیم نے ہدف4 وکٹ پر حاصل کرلیا، مین آف دی میچ فواد عالم نے 3وکٹیں اڑانے کے بعد مشکل وقت میں ناقابل شکست27رنز بھی بنائے۔گروپ سی میں سرفہرست فیصل آباد وولفز نے ایونٹ میں پہلی فتح کو ترستے لاہور ایگلز کیخلاف8وکٹ سے کامیابی سمیٹی،اس پول میں رنرز اپ اسلام آباد لیپرڈز بھی اگلے مرحلے میں پہنچ گئے، گروپ بی میں ملتان ٹائیگرز کی رائونڈ 8میں جگہ پکی ہو گئی،دوسری ٹیم کا فیصلہ بدھ کو راولپنڈی ریمز اور کراچی زیبراز کے میچ سے ہونا ہے، گروپ ڈی کی رنرز اپ کا تعین سرفہرست لاہور لائنز کے ایبٹ آباد فالکنز کیخلاف مقابلے سے ہو گا۔

موصولہ اطلاعات کے مطابق کراچی ڈولفنز نے سیالکوٹ اسٹالینز کو 6 وکٹ سے مات دیدی، ناکام ٹیم 91 رنز پر ڈھیر ہو گئی، کپتان شعیب ملک21 رنز کے ساتھ ٹاپ اسکورر رہے،علی خان 17 اور حارث سہیل 15 رنز بنا پائے،کسی اور کو ڈبل فیگر تک پہنچنا بھی نصیب نہ ہوا، عبدالامیر نے 4 اور فواد عالم نے 3کھلاڑیوں کو پویلین کی راہ دکھائی، عاطف مقبول اور اعظم حسین کے حصے میں ایک،ایک وکٹ آئی۔ کراچی ڈولفنز نے ہدف 4 وکٹ پر17.1 اوورز میں حاصل کر لیا، 62 رنز کی شراکت قائم کرنے والے شہر یار غنی 32 اور فواد عالم 27 پر ناقابل شکست رہے۔ اس سے قبل فاتح ٹیم نے خالد لطیف (2)، اسد شفیق(13)، شاہ زیب حسن (11)، سرفراز احمد (1)کی وکٹیں صرف 30 رنز پر گنوا دی تھیں، رضا حسن نے2 جبکہ عبدالرحمان اور شاہد یوسف نے ایک، ایک پلیئر کو آئوٹ کیا۔

دوسرے میچ میں فیصل آباد وولفز نے لاہور ایگلز کیخلاف8 وکٹ سے کامیابی حاصل کی، ناکام ٹیم نے 8 وکٹ پر93 رنز بنائے، کامران اکمل (30) اور عمران فرحت (23) کے سوا کوئی ڈبل فیگر میں داخل نہ ہو سکا،2 وکٹ پر65 رنز بنانے والی ٹیم کے باقی بیٹسمین ریت کی دیوار ثابت ہوئے، مین آف دی میچ سعید اجمل نے3 جبکہ اسد علی اور خرم شہزاد نے2،2 وکٹیں لیں۔ فیصل آباد وولفز نے آسان ہدف صرف2 وکٹ پر13.4اوورز میں حاصل کر لیا، علی وقاص31رنز پر ناقابل شکست رہے، خرم شہزاد نے27 اور فرخ شہزاد نے23 رنز بنائے، جنید ضیا اور تنزیل الطاف نے ایک، ایک وکٹ حاصل کی۔ اب تک کھیلے گئے میچز میں گروپ اے میں سیالکوٹ اسٹالینز ہارنے کے باوجود 6 پوائنٹس کے ساتھ سرفہرست ہے،فتح کی بدولت کراچی ڈولفنز کی ٹیم5 پوائنٹس کے ہمراہ دوسرے نمبر پر آگئی،اتنے ہی پوائنٹس کے حامل لاڑکانہ بلز رن ریٹ میں0.528 کے فرق کی وجہ سے تیسرے نمبر پر رہے۔

گروپ بی میں ملتان ٹائیگرز 5 پوائنٹس کے ساتھ پہلی پوزیشن پر قابض ہوئے، راولپنڈی ریمز صرف ایک میچ جیت کر بھی دوسرے نمبر پر ہے،گروپ سی میں فیصل آباد وولفز نے 5 پوائنٹس حاصل کرکے ٹائٹل کی جانب پیش قدمی جاری رکھی، اسلام آباد لیپرڈز 4 پوائنٹس دوسری پوزیشن پر ہیں،گروپ ڈی میں لاہور لائنز 4 کے ساتھ پہلے، ڈیرہ مراد جمالی3پوائنٹس کے ساتھ دوسرے نمبر پر ہیں۔ گروپ سے کوارٹر فائنل میںپہنچنے والی دوسری ٹیم کا فیصلہ بدھ کو راولپنڈی ریمز اور کراچی زیبراز کے میچ سے ہوگا، گروپ ڈی کی رنرز اپ کا تعین کرنے کیلیے سرفہرست لاہور لائنز اور ایبٹ آباد فالکنز کے مقابلے کا انتظار کرنا ہوگا۔