پولیس مقابلوں میں 2 گینگ وار کارندوں سمیت ڈکیت ہلاک

رضویہ میں بس کے اندرلوٹ مار کرنیوالے ڈکیتوں کا پولیس سے مقابلہ ایک ملزم فرار ہوتے ہوئے ہلاک، دوسرا زخمی حالت میں گرفتار۔ فوٹو: فائل

---

رضویہ اور ملیر میں2 مقابلوں کے دوران پولیس نے لیاری گینگ وار کے2 کارندوں سمیت 3 ملزمان کو ہلاک اور ایک ملزم کو زخمی حالت میں گرفتار کر لیا، ملیر کے مبینہ مقابلے میں ہلاکتوں کے خلاف مشتعل افراد نے قومی شاہراہ بند کرکے شدید احتجاج کیا۔

پولیس نے لاٹھی چارج اور شلینگ کر کے مشتعل مظاہرین کو منتشر کردیا، تفصیلات کے مطابق ملیر سٹی تھانے کی حدود سالارگوٹھ میں پولیس اور رینجرز کی مشترکہ کارروائی میں ملزمان نے پولیس اور رینجرز پر فائرنگ کردی اور جوابی فائرنگ میں لیاری گینگ وار کے2 کارندے ہلاک ہوگئے ملزمان کے دیگر ساتھی موقع سے فرار ہوگئے، ڈی ایس پی رائو اقبال کے مطابق پولیس نے لاشیں جناح اسپتال منتقل کیں جہاں مقتولین کی شناخت محمد عارف عرف بلا ولد ہاشم اور شان عرف شانی مہاجر کے نام سے ہوئی ہے، پولیس کے مطابق ہلاک ملزمان کا تعلق لیاری گینگ وار عذیر بلوچ کے سہیل ڈاڈا گروپ سے تھا، ملزمان کے قبضے سے ایک ٹی ٹی پستول اور ٹرپل ٹو رائفل برآمد ہوئی ہے، عارف لیاری کلاکو ٹ اور شان ملیر غازی ٹائون کا رہائشی تھا،ذرائع کے مطابق شان پہلے بھی گرفتار ہوچکا تھا،پولیس کارروائی کے بعد لاشیں ورثا کے حوالے کردی گئیں، ہلاکتوں کے خلاف مشتعل افراد نے2 مقامات نیشنل ہائی وے اور ملیر کورٹ کے سامنے سڑک بند کرکے پولیس اور رینجرز کے خلاف احتجاج کے دوران ٹائر نذر آتش کیے۔

مشتعل افراد کے منتشر نہ ہونے پر پولیس اور رینجرز نے لاٹھی چارج اور شیلنگ کرکے مظاہرین کو منتشر کردیا، رضویہ تھانے کی حدود حیدری مسجد کے قریب روٹ 4-K بس میں 2 مسلح ملزمان مسافروں سے لوٹ مار کے بعد فرار ہو رہے تھے کہ مسافروں کے شور مچانے پر پولیس اہلکار پہنچ گئے،ملزمان کی فائرنگ پر پولیس کی جوابی فائرنگ میں ملزم اجمل ملوک ولد عبداﷲ زخمی حالت میں گرفتار ہوگیا جس سے پستول اور لوٹا گیا سامان برآمد کر لیا گیا،جبکہ اس کا زخمی ساتھی رکشا نمبر ڈی 41314 میں سوار ہوکر فرار ہوگیا جس کی لاش کچھ دیر بعد جمشید کوارٹر تھانے کی حدود فلمستان سینما کے قریب رکشے میں مل گئی،ملزم کے سر پر گولی لگی تھی،پولیس نے لاش کو اسپتال منتقل کردیا،ایس ایچ او حسن حیدر نے بتایا کہ2 مسلح ملزم 4-K کی بس میں لوٹ مار کر رہے تھے اور ایک ملزم بس کے پیچھے رکشا لے کر چل رہا تھا، ملزمان کی لوٹ مار کے بعد فرار ہوتے وقت پولیس موقع پر پہنچ گئی ہلاک ملزم کی افسر کے نام سے شناخت ہوئی ہے۔