سندھ اسمبلی میں ایم کیو ایم کے اراکین کے مائیک بند کئے جانے پر شدید ہنگامہ آرائی

ایم کیوایم کے اراکین نے ایوان میں ’’گو ڈپٹی اسپیکرگو‘‘ کے نعرے بھی لگائے فوٹو؛ایکسپریس نیوز

---

ISLAMABAD: سندھ اسمبلی کا اجلاس ایم کیو ایم کے اراکین کے مائیک بند کئے جانے پر شدید ہنگامہ آرائی کی نذر ہوگیا جس کے بعد اسپیکر کو اجلاس کل تک ملتوی کے لئے ملتوی کرنا پڑا۔

ایکسپریس نیوز کے مطابق اجلاس کے دوران سندھ اسمبلی میں ایم کیو ایم کے اقلیتی رکن دیوان چند چاؤلہ کا کہنا تھا کہ صوبے میں ہندوبرادری کی لڑکیوں کو اغوا کر کے جبری مسلمان کرکے شادیاں کیں جارہی ہیں، اس صورتحال کی وجہ سے ہندو برادری کے لوگ ملک چھوڑنے پرمجبورہیں، باب الاسلام سندھ میں کوئی مجاہد ہے جو ہندوؤں کو اسلامی تعلیمات کے مطابق تحفظ فراہم کرے، اس دوران دیوان چند چاؤلہ جذباتی اندازمیں تقریرکررہے تھے تواجلاس کی صدارت کرنے والی ڈپٹی اسپیکرنے ان کا مائیک بند کرادیا اورکہا کہ کوئی انہیں پانی پلائے۔

ایم کیو ایم کے اقلیتی رکن کا مائیک بند کئے جانے اور ایوان میں بولنے کی اجازت نہ دینے کے خلاف ایم کیوایم کے اراکین نے ''گو ڈپٹی اسپیکر گو'' کے نعرے لگا کر ایوان کو سر پر اٹھالیا، شورشرابے کے باعث اجلاس 10 منٹ کے لیے ملتوی کردیاگیا جب اجلاس دوبارہ شروع ہوا تو غنڈہ گردی نامنظور کے نعرے بھی لگائے گئے جس کے بعد ڈپٹی اسپیکر کی جگہ اسپیکر آغا سراج درانی اجلاس کی صدارت کرنے آئے تو ایم کیو ایم کے ارکان نے ڈیسک بجاکر ان کا استقبال کیا۔۔