بجلی کا شارٹ فال مزید بڑھ گیا غیر متوازن لوڈ سے ٹرانسفارمرپھٹنے لگے

بجلی کی مجموعی پیداوار 21 ہزار923 اور طلب 27 ہزار 500میگاواٹ ہے (فوٹو فائل)

---

ملک میں بجلی کا مجموعی شارٹ فال بڑھ کر 7 ہزار 577 میگاواٹ ہو گیا جب کہ لوڈ غیر متوازن ہونے سے ٹرانسفارمر پھٹنے کے علاوہ کنڈکٹر ٹوٹ رہے ہیں۔

ذرائع پاور ڈویژن کے مطابق بجلی کا پیداواری شارٹ فال 5ہزار577 میگاواٹ ہے جب کہ ڈسٹری بیوشن شارٹ فال 2ہزار میگاواٹ ہے۔ دیہی اور شہری علاقوں میں لوڈشیڈنگ شیڈول میں فرق سے 2 ہزار میگاواٹ بجلی تقسیم نہیں ہوپا رہی جب کہ لوڈ غیر متوازن ہونے سے ٹرانسفارمر پھٹ رہے ہیں اور کنڈکٹر ٹوٹ رہے ہیں۔

بجلی کی مجموعی پیداوار 21 ہزار923 میگاواٹ ہے جب کہ ملک میں بجلی کی کل طلب 27 ہزار 500میگاواٹ ہے۔ ذرائع کے مطابق پانی سے 5 ہزار 269 میگاواٹ اور سرکاری تھرمل پلانٹس 1 ہزار 572میگاواٹ بجلی پیدا کررہے ہیں ۔

یہ خبر بھی پڑھیے: بجلی کا شارٹ فال مزید بڑھ گیا، لوڈشیڈنگ دورانیے میں بھی اضافہ

نجی شعبے کے بجلی گھروں کی مجموعی پیداوار 11ہزار 668 میگاواٹ ہے جب کہ ونڈ پاور پلانٹس 1ہزار 539 میگاواٹ اور سولرپلانٹس 500 میگاواٹ بجلی پیدا کررہے ہیں۔ بگاس سے چلنے والے پلانٹس کی پیداوار 137 میگاواٹ ہے۔ جوہری ایندھن سے 2ہزار 239 میگاواٹ بجلی پیدا کی جارہی ہے ۔

ذرائع پاور ڈویژن کے مطابق ملک کے مختلف علاقوں میں 14 گھنٹے تک کی لوڈشیڈنگ کی جارہی ہے ۔ اسلام آباد ریجن میں بھی 6 گھنٹے تک لوڈ شیڈنگ ہورہی ہے جب کہ زیادہ نقصانات والے علاقوں میں لوڈشیڈنگ کا دورانیہ زیادہ ہے ۔