سری لنکن صدر مالدیپ فرار ملک میں ایمرجنسی اور کرفیو نافذ

سری لنکا کے صدر سمیت حکومتی عہدیداروں کیخلاف شدید احتجاج کیا جارہا ہے:فوٹو:فائل

---

سری لنکا کے صدرگوٹابایا راجا پاکسے فوجی طیارے میں ملک سے فرار ہوکر مالدیپ پہنچ گئے جس پر وزیراعظم وکرما سنگھے کو قائم مقام صدر کا چارج بھی دیدیا گیا۔

غیرملکی میڈیا کے مطابق سری لنکا کے صدر گوٹابایا راجا پاکسے ملک سے فرار ہوکر مالدیپ پہنچ گئے۔سری لنکن صدر فوجی طیارے میں مالدیپ پہنچے۔وزیراعظم رینل وکرما سنگھے کو قائم مقام صدر مقررکردیا گیا ہے۔

ملک میں اس اہم تبدیلی کے باوجود مشتعل مظاہرین سیکیورٹی فورسز کے قابو میں نہیں آ رہے ہیں۔ ہزاروں مظاہرین نے سرکاری ٹیلی وژن پر دھاوا بول دیا اور وزیراعظم ہاؤس پر احتجاجی پرچم لہرادیا گیا۔

حالات کنٹرول میں نہ آنے پر وزیراعظم وکرما سنھگے نے ملک میں ایمرجنسی اور کئی علاقوں میں کرفیو نافذ کردیا گیا۔ اس کے باوجود ملک بھر میں مظاہرے جاری ہیں اور سیکیورٹی فورسز تاحال حالات قابو میں نہ کرسکیں۔

SriLanka : Protesters have taken over the Prime Minister's office in Colombo
📸 @Skandha92 #SriLanka pic.twitter.com/YrVZcthcQw

— South Asian Journal (@sajournal1) July 13, 2022

سری لنکا میں بدترین معاشی بحران کے بعد حکمران اشرافیہ کے خلاف شدید احتجاج اورمظاہرے جاری ہیں۔ چند روز قبل ہزاروں مشتعل مظاہرین نے صدارتی محل پردھاوا بول دیا تھا جس کے بعد صدر گوٹابایا کی روپوشی کی اطلاعات سامنے آئی تھیں۔

اس سے قبل صدر گوتابایا راجا پکشے نےاپنے عہدے سے استعفی دینے کا وعدہ کیا تھا تاہم اس پر عمل نہیں کیا۔

میڈیا رپورٹس میں مزید بتایا گیا ہے کہ صدر کے بھائی اورسری لنکا کے سابق وزیرخزانہ بسل راجا پکسے بھی ملک سے فرار ہوکر امریکا پہنچ گئے ہیں۔

واضح رہے کہ سری لنکا میں عوام کو سنگین معاشی بحران کے باعث گذشتہ کئی ماہ سے بدترین لوڈشیڈنگ، ایندھن، خوراک، دواؤں اور دیگر بنیادی ضروریات کی شدید قلت کا سامنا ہے۔