کوئٹہ؛ بلال نورزئی کے 5 قاتلوں کو 43 سال قید کی سزا

 اتوار 4 ستمبر 2022
—فائل فوٹو

—فائل فوٹو

کوئٹہ کی مقامی عدالت نے صوبائی دارالحکومت کے علاقے خروٹ آباد سے تعلق رکھنے والے نوجوان بلال نورزئی کے قتل کے جرم میں 5 ملزمان کو 43 سال قید بامشقت کی سزا سنادی۔

بلال نورزئی کو مئی 2020ء میں کوئٹہ کے ہزارہ ٹاؤن میں بے دردی سے قتل کر دیا گیا تھا۔

ایڈیشنل ڈسٹرکٹ اینڈ سیشن جج اسد اللہ خان کاکڑ نے فیصلہ سنایا۔ جج نے نوجوان کے خون میں ملوث 4 دیگر ملزمان کو بھی 10-10 سال قید کی سزا سنائی۔ پولیس نے فیصلہ سننے کے بعد تمام ملزمان کو ڈسٹرکٹ جیل کوئٹہ منتقل کر دیا۔

بلال نورزئی کے قتل کے بعد کوئٹہ میں احتجاجی مظاہرے شروع ہوگئے تھے اور مشتعل مظاہرین نے ملزمان کی گرفتاری کے لیے حکومت پر دباؤ بڑھانے کے لیے شہر کے ریڈ زون کو بند کردیا تھا۔

سابق وزیراعلیٰ جام کمال خان نے نوجوان کے قتل کی تحقیقات کے لیے مشترکہ تفتیشی ٹیم (جے آئی ٹی) بنانے کا حکم دیا تھا۔ جے آئی ٹی نے اپنی رپورٹ صوبائی حکومت کو پیش کرتے ہوئے نورزئی کے قتل کا ذمہ دار مذکورہ ملزمان کو ٹھہرایا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔