عدالتی کمیشن بنا کر مقصود قریشی کے قتل کی تحقیقات کرائی جائیں الطاف حسین

ملزم خواہ کتنے ہی با اثر کیوں نہ ہوں ان کے خلاف سخت کارروائی کی جائے، الطاف حسین فوٹو:فائل

---

ایم کیو ایم کے قائد الطاف حسین نے جئے سندھ قومی محاذ (جسقم) کے رہنماؤں کے قتل کی غیرجانبدارانہ تحقیقات کرانے کا مطالبہ کرتے ہوئے کہا ہے کہ ملزم خواہ کتنے ہی با اثر کیوں نہ ہوں ان کے خلاف سخت کارروائی کی جائے۔

متحدہ قومی موومنٹ کے قائد الطاف حسین نے وزیراعظم نوازشریف، وزیراعلیٰ اور گورنر سندھ سے اپیل کی ہے کہ وہ پاکستان کی بقاء و سلامتی کی خاطر جسقم کے رہنماء بشیرقریشی کے بھائی مقصود قریشی اور ان کے ساتھی سلیمان ودھو کے قتل اور ان کی لاشیں جلائے جانے کے واقعہ کی فوری طورپر غیرجانبدارانہ تحقیقات کرائیں اور اس کے ذمہ داروں کو قرار واقعی سزا دلوائیں۔

الطاف حسین نے کہا کہ ارباب اختیار کو سوچنا چاہیے کہ ایسا عمل کرنے والوں نے اپنے اس اقدام سے ملک کی کیا خدمت کی ہے، اس قسم کے وحشیانہ اقدامات ملک کے کسی بھی حصے میں ہوں وہ منفی رحجانات کو فروغ دینے کا سبب بنتے ہیں اور عوام میں ملک سے محبت کے بجائے نفرت کے جذبات تیزی سے بڑھتے ہیں جس سے علیحدگی پسند قوتوں کو تقویت ملتی ہے۔

ایم کیو ایم کے قائد کا مزید کہنا ہے کہ اس وقت جب طالبان سے مذاکرات کیے جارہے ہیں، ضرورت اس امر کی ہے کہ ملک سے ناراض اور علیحدگی پسند رحجانات رکھنے والے افراد اور گروپوں سے بھی اسی طرز پر مذاکرات کیے جائیں، مقصود قریشی اور ان کے ساتھی کے بہیمانہ قتل کی تحقیقات عدالتی کمیشن کے ذریعے کرائیں اور کمیشن کی رپورٹ کی روشنی میں اس واقعہ کے ذمہ داروں کو خواہ وہ کتنے ہی بااثر کیوں نہ ہوں سخت سے سخت سزا دی جائے۔