پاکستان ٹیم کیلیے غیر ملکی کوچز پر انحصار مہنگا پڑرہا ہے میانداد

کھلاڑی نہیں جانتا کب کیریئر ختم ہوجائے گااسی لیے فکسنگ ہوتی ہے، سابق کپتان (فوٹو: ٹوئٹر)

---

جاوید میانداد نے کہا کہ پاکستان ٹیم کیلیے غیر ملکی کوچز پر انحصار مہنگا پڑرہا ہے۔

''ایکسپریس نیوز'' سے گفتگوکرتے ہوئے سابق کپتان نے کہا کہ گذشتہ کچھ عرصے میں پاکستان ٹیم کیلیے غیر ملکی کوچز پر انحصار کیا جاتا رہا جو مہنگا پڑ رہا ہے، ان کو یہاں اسٹوڈیو میں بلائیں ہم سوال پوچھیں گے کہ وہ کرکٹ کے بارے میں کتنا جانتے ہیں، پی سی بی غیر ملکی کوچز کی تقرری کرکے اپنا دامن بچانے کی کوشش کرتا ہے۔

مزید پڑھیں: مصباح الحق نے بورڈ میں برسوں سے براجمان عہدیداروں پر سوال اٹھا دیا

ایک سوال پر انھوں نے کہا کہ ہم تو کاؤنٹی کرکٹ کھیلتے تھے، مجھے کئی طرف سے کھیلنے کی پیشکش ہوتی تھی، اگر کوئی کرکٹر پرفارم نہیں کرتا اور ٹیم سے باہر ہوجائے تو اس کا کیا مستقبل ہے،اسی وجہ سے فکسنگ ہوئی ہے کہ کھلاڑی نہیں جانتا کب کیریئر ختم ہوجائے گا۔

یاد رہے کہ ٹی20 ورلڈکپ میں پاکستان ٹیم کے مینٹور میتھیو ہیڈن اور بولنگ کوچ شان ٹیٹ تھے،گذشتہ سال میگا ایونٹ میں ورنون فلینڈر ہمراہ تھے۔