شام میں ملبے تلے دبی بچی 17 گھنٹے تک چھوٹی بہن کی ڈھال بنی رہی؛ ویڈیو وائرل

ویب ڈیسک  بدھ 8 فروری 2023
شام اور ترکیہ میں زلزلے میں 10 ہزار افراد جاں بحق ہوگئے، فوٹو: ویڈیو گریب

شام اور ترکیہ میں زلزلے میں 10 ہزار افراد جاں بحق ہوگئے، فوٹو: ویڈیو گریب

دمشق: شام کے زلزلے میں تباہ ہونے والی عمارت کے ملبے میں دبی 10 سالہ بہن اپنی چھوٹی بہن کے سر کو زخمی ہونے سے بچانے کے لیے 17 گھنٹے تک ڈھال بنی رہی۔ دونوں بہنوں کو بحفاظت نکال لیا گیا جس کی ویڈیو وائرل ہوگئی۔

ترکیہ اور شام میں آنے والے خوفناک زلزلے میں تیسرے روز بھی ملبے سے لاشیں ملنے کا سلسلہ جاری ہے اور جاں بحق افراد کی تعداد دس ہزار تک جا پہنچی ہے وہیں ملبے سے معجزاتی طور پر زندہ نکالے جانے والے افراد کی تعداد میں بھی اضافہ ہو رہا ہے۔

https://twitter.com/Omar_Madaniah/status/1622906997707313152?s=20&t=YS9GBjtbu5DyI-B8Lycb2w

ایسی ہی ایک واقعے کی ویڈیو سوشل میڈیا پر وائرل ہورہی ہے جس میں دیکھا جا سکتا ہے کہ ایک بچی اپنی چھوٹی بہن کے ساتھ ملبے میں دبی ہوئی ہے اور پتھروں کے بوجھ سے وہ ہل بھی نہیں پا رہی ہیں۔ وہ بچی اپنی چھوٹی بہن کے سر کو زخمی ہونے سے بچا رہی ہے اور اسے دلاسہ دے رہی ہیں۔

یہ خبر بھی پڑھیں : ملبے کے ڈھیر پر مردہ بیٹی کا ہاتھ تھامے بے بس باپ کی تصویر دیکھ کر ہر آنکھ اشکبار

بچی ریسکیو اہلکاروں کو دیکھ کر کہتی ہے کہ آپ ہمیں یہاں سے نکال لیں، میں ساری عمر آپ کی خدمت کروں گی جس سے وہاں موجود تمام افراد کی آنکھوں میں آنسو آجاتے ہیں۔

https://twitter.com/JrTomos/status/1623213527338225665?s=20&t=EiSAhH9nk3V-RQcUCyiSdQ

امدادی رضاکار بچی کو بہلانے کے لیے اس سے کھلونوں اور کھیلوں کی باتیں کرتے ہیں تاکہ بچی کا دھیان حادثے سے ہٹ جائے اور تب تک ریسکیو ٹیم کے دیگر ارکان نے دونوں بچیوں کو بحفاظت نکال لیا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔