پی سی بی کا مکی آرتھراورمورنے مورکل کی خدمات حاصل کرنے کا فیصلہ

ویب ڈیسک  بدھ 29 مارچ 2023
فوٹو؛ فائل

فوٹو؛ فائل

 دبئی: پاکستان کرکٹ بورڈ نے سابق جنوبی افریقی فاسٹ بولرمورنے مورکل  کو بولنگ کوچ اور مکی آرتھر کو کنسلٹنٹ مقرر کرنے کا فیصلہ کرلیا جبکہ اینڈریو پٹک کو بیٹنگ کوچ کی ذمہ داری سونپی جائے گی۔

ویب سائٹ کرک انفو کے مطابق پی سی بی نے کرکٹ  ٹیم کے لیے تین سابق جنوبی افریقی کھلاڑیوں کی خدمات حاصل کرنے کا فیصلہ کیا ہے  جن میں سابق فاسٹ بولرمورنے مورکل، سابق فرسٹ کلاس کرکٹرمکی آرتھر اوراینڈریو پٹک شامل ہیں۔ مکی آرتھر ماضی میں بھی پاکستانی ٹیم کے ہیڈ کوچ رہ چکے ہیں۔

ویب سائٹ کے مطابق مورنے  مورکل کو قومی کرکٹ ٹیم کے بولنگ کوچ کی ذمہ داریاں سونپی جائیں گی  جبکہ فرسٹ کلاس کرکٹ میں 10 ہزار سے زائد رنز اور 27 سینچریاں اسکور کرنے والے اینڈریو پٹک پاکستانی کھلاڑیوں کو  بلے بازی کے گر سکھائیں گے۔

پی سی بی نے مکی آرتھرکو کنسلٹنٹ مقرر کرنے پر رضامندی ظاہر کی ہے جبکہ وہ ڈربی شائر  کے ہیڈکوچ کی حیثیت سے بھی اپنے فرائض ادا کرتے رہیں گے۔

پی سی بی نے کوچنگ گروپ کو اس طرح ترتیب دیا ہے کہ مکی آرتھر پاکستان آئے بغیراس کے ڈائریکٹر کا کردار نبھاتے رہیں گے۔ وہ آئندہ ماہ  لاہور آئیں گے اورپھرورلڈ کپ سے پہلے تربیتی کیمپ کو جوائن کریں گے۔

مورنے مورکل انڈین پریمیئر لیگ میں لکھنؤ سپرجائنٹس کے بولنگ کوچ کی حیثیت سے معاہدے کی مدت پوری ہونے کے بعد  پاکستانی ٹیم کو جوائن کریں گے۔

اینڈریوپٹک آئندہ ماہ قومی کرکٹ ٹیم کوجوائن کرلیں گے، وہ 2005 سے  جنوبی افریقی ٹیم کے بیٹنگ کنسلٹنٹ  کے طور پرخدمات انجام دے رہے ہیں۔

 

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔