بینائی میں کمی کی چار علامات

باقاعدہ معائنے سے مرض کی بروقت تشخیص ممکن ہے

اتوار 4 جون 2023

باقاعدہ معائنے سے مرض کی بروقت تشخیص ممکن ہے

آپ کو آپٹومیٹرسٹ کے پاس گئے کتنا عرصہ ہو گیا ہے؟

امریکہ میں آنکھوں کے بہترین کلینک میں سے ایک کے طور پر پہچانے جانے والے اور یونیورسٹی آف میامی میں ’بیسکم پالمر آئی انسٹیٹیوٹ‘ میں آپٹومیٹری سروسز کے ڈائریکٹر ڈاکٹر مارک ٹی ڈنبر تجویز کرتے ہیں کہ جائزہ سالانہ ہونا چاہیے۔

ڈاکٹر مارک نے بی بی سی کو بتایا، ’’کچھ معاملات میں، آپ اسے ہر دو سال بعد کر سکتے ہیں لیکن مثالی طور پر یہ معائنہ سالانہ ہونا چاہیے۔‘‘ اچھی بصارت رکھنے کی اہمیت سمجھنے کے باوجود، ہم میں سے بہت سے ایسے ہیں جو آنکھوں کی صحت کو معمولی سمجھتے ہیں، یا تو اس لیے کہ ہم سمجھتے ہیں کہ ہماری نظر اچھی ہے یا پھر، کسی وقت ہم چشمے کا ایک جوڑا لینے کے لیے ماہر امراض چشم کے پاس گئے اور پھر چیزوں کو ایسے ہی چھوڑ دیا۔

مارک کا کہنا ہے، ’’ہم میں سے وہ لوگ جن کی پوری زندگی اچھی بصارت رہی ہے، وہ اس کی قدر نہیں کرتے۔ یہ کوئی غیر معمولی بات نہیں ہے ہمیں ایسے لوگ دکھائی دیں جو 40 یا 50 کی دہائی میں ہیں اور انھوں نے کبھی آنکھوں کا معائنہ نہیں کروایا۔‘‘ ماہرین کے مطابق انسانی آنکھ جیسے عضو کی پیچیدگی کی وجہ سے ہمارے لیے کچھ تبدیلیاں محسوس نہ کرنا آسان ہوتا ہے۔

جیسے کہ دونوں آنکھوں کے درمیان بینائی کے معیار میں معمولی تبدیلیاں یا بصارت کا عمومی طور پر بگڑ جانا۔ عینک پہننے والے مریضوں کے متعلق ان کا کہنا تھا، ’’اگر آپ اپنے طبی نسخے کو اپ ڈیٹ نہیں کرتے ہیں، تو آپ بنیادی طور پر اچھی طرح سے نہیں دیکھ پاتے۔‘‘ ڈاکٹر مارک نے کچھ علامات کی تفصیلات بتائی ہیں جو اس بات کی نشاندہی کرتی ہیں کہ یہ آپٹومیٹرسٹ کے پاس جانے کا وقت ہے، یا تو پہلی بار یا آپ کے عینک کے نسخے کو اپ ڈیٹ کرنے کا۔

گاڑی چلاتے وقت دیکھنے میں دشواری

ڈاکٹر مارک ڈنبر کے مطابق، ’’جب آپ ٹریفک کے نشان کو پڑھنے کی کوشش کر رہے ہوں اور آپ اسے اس وقت تک نہیں دیکھ سکے جب تک کہ آپ اس کے بالکل اوپر نہ ہوں، تو یہ عام طور پر ایک انتباہی علامت ہوتی ہے۔‘‘ کیمرے کی طرح آپ کی آنکھوں کو واضح طور پر دیکھنے کے لیے روشنی کو ریٹنا پر مرکوز کرنے کی ضرورت ہے۔

جب آپ کو بصارت کا مسئلہ درپیش ہوتا ہے، تو روشنی ریٹنا کے سامنے مرکوز ہوتی ہے، جو دور کی چیزوں کو، جیسے سڑک کے نشانات، کو دھندلا سکتی ہے۔ اس حالت میں خاص طور پر رات کے وقت گاڑی چلانا مشکل ہو سکتا ہے۔

آپ کی آنکھوں کے لیے نظر کے چشمے جو کام کرتے ہیں، وہ یہ ہے کہ نہ صرف روشنی کے داخلے کو بہتر بنایا جائے بلکہ یہ بھی کہ اس کی تقسیم پوری آنکھ کی سطح پر صحیح طریقے سے ہو۔ اس کے علاوہ، نئی اینٹی ریفلیکٹیو لینس ٹیکنالوجی روشنی کی چکاچوند کو مدھم کرنے میں مدد کرتی ہے تاکہ آپ زیادہ واضح طور پر دیکھ سکیں۔

قریب سے دیکھنے میں دشواری

اگر آپ کتابیں پڑھتے ہوئے یا اپنے فون کی سکرین کو پڑھتے ہوئے بہت مشکل محسوس کرتے ہیں، یہاں تک کہ عینک لگا کر بھی، یہ اس بات کی علامت ہے کہ آپ کو ایک نئے نسخے کی ضرورت ہے۔ پریسباؤپیا یعنی ضعفِ بصارت ہماری عمر کے ساتھ ہوتا ہے اور ہماری آنکھوں میں موجود لینز لچک کھو دیتے ہیں، جس سے قریبی چیزوں پر توجہ مرکوز کرنا مشکل ہو جاتا ہے۔

ڈاکٹر مارک بتاتے ہیں کہ آنکھ کی صحت ٹھیک ہو سکتی ہے، لیکن مسئلہ روشنی کے انعطاف میں ہے۔ جب یہ ریٹینا پر ٹھیک طرح سے مرکوز نہیں ہوتا ہے، تو تصویر دھندلی دکھائی دے سکتی ہے۔ شیشے انعطاف کے مسئلے کو درست کرتے ہیں اور پڑھنے کی کوشش کرتے وقت آنکھ کو زیادہ مشقت سے روکتے ہیں۔

دن کے وقت اتار چڑھاؤ کا شکار بینائی

اگر آپ دیکھتے ہیں کہ دن بھر آپ کی بینائی میں اتار چڑھاؤ آتا ہے، تو یہ ایک اور علامت ہو سکتی ہے کہ آپ کو اپنے لینز تبدیل کرنے کی ضرورت ہے۔ ڈاکٹر مارک بتاتے ہیں کہ اس کی ایک بڑی وجہ آنکھ کے پٹھوں کی تھکاوٹ کی وجہ سے آنکھوں میں تناؤ ہے۔

اگر آپ زیادہ دیر تک کسی ایک نقطہ پر توجہ مرکوز کرتے ہیں، جیسے کہ جب آپ سکرین پر کام کر رہے ہوں، تو آپ کی آنکھیں تھک سکتی ہیں اور آپ کی توجہ مرکوز کرنے کی صلاحیت کم ہو سکتی ہے۔ ’’جب آپ کوئی ایسا کام کر رہے ہوتے ہیں جس پر آپ واقعی توجہ مرکوز کر رہے ہوتے ہیں، جیسے کمپیوٹر پر کام کرنا، یا فلم دیکھنا، یا کوئی کتاب پڑھنا، تو ہماری پلک جھپکنے کی شرح کم ہو جاتی ہے۔

شاید معمول کے نصف تک۔‘‘ یہ بدتر ہو سکتا ہے، اگر آپ اپنی آنکھوں پر دباؤ ڈال رہے ہیں، آپ بصری کمی کا مقابلہ کرنے کی کوشش کر رہے ہیں، آپ کی آنکھیں دباؤ کا شکار ہو جائیں گی اور دن کے آخر میں یہ بدتر ہو جائے گا۔ اگر آپ کے ساتھ بھی ایسا معاملہ ہے، تو شاید آپ کے لیے آپٹومیٹرسٹ کے پاس جانے کا وقت آگیا ہے۔

بصارت میں تبدیلی

ایک یا دونوں آنکھوں کی بصارت میں تیزی سے آنی والی تبدیلی اس بات کی علامت ہو سکتی ہے کہ کچھ زیادہ سنگین ہو رہا ہے۔

ڈاکٹر مارک ڈنبر کے مطابق، ’’اگر آپ کو صاف دکھائی نہیں دے رہا تو اس کا حل چشمے تبدیل کرنے جتنا آسان ہوسکتا ہے، لیکن یہ کچھ زیادہ پیچیدہ معاملہ بھی ہوسکتا ہے۔‘‘ مثال کے طور پر، مختصر مدت میں بینائی کا نقصان موتیا کی علامت ہو سکتا ہے، جو واضح طور پر دیکھنے میں دشواری، رات کو گاڑی چلانے میں دشواری اور توجہ مرکوز کرنے میں دشواری کا سبب بن سکتا ہے۔موتیا کی صورت میں جدید طریقہ علاج سے مختصر وقت میں سرجری ہو جاتی ہے۔

زیادہ سنگین صورتوں میں، آنکھوں کی صحت، زیادہ سنگین مسائل جیسے ذیابیطس اور ہائی بلڈ پریشر کی نشاندہی کرنے میں بھی مدد کر سکتی ہے، جو آنکھ میں خون کی نالیوں میں تبدیلی کا سبب بن سکتی ہے۔ یہ سب چیزیں اس بات کی نشاندھی کرتی ہیں کہ لوگ باقاعدگی سے اپنی آنکھوں کی جانچ کروائیں۔ (بشکریہ بی بی سی)