سویڈن میں قرآن کی بے حرمتی پر او آئی سی کا ہنگامی اجلاس طلب

عراقی پناہ گزین نے سویڈین میں عید گاہ کے باہر قرآن کو نذر آتش کیا؛ فوٹو: ٹوئٹر

---

سویڈن میں قرآن پاک کے نسخے کو نذر آتش کرنے کی ناپاک جسارت پر اسلامی تعاون تنظیم نے ایگزیکٹو کمیٹی کا ہنگامی اجلاس اتوار کو طلب کر لیا۔

عرب نیوز کے مطابق 57 مسلم ممالک کی نمائندگی کرنے والی ''اسلامی تعاون تنظیم'' کی ایگزیکٹو کمیٹی کے ہنگامی اجلاس میں اس ناپاک حرکت کی شدید الفاظ میں مذمت کی جائے گی اور اس کے تدارک کے لیے تبادلہ خیال کیا جائے گا۔

او آئی سی کے ترجمان نے بتایا کہ آزادیٔ اظہار رائے کے نام پر کسی کو بھی کسی کے مذہب کے شعائر کی بے حرمتی کی اجازت نہیں دی جا سکتی۔ تنظیم اس معاملے پر متفقہ طور پر سخت مؤقف اپنائے گی جس کے لیے یہ اجلاس طلب کیا گیا ہے۔

یہ خبر بھی پڑھیں : روسی صدر پوٹن نے قرآن کو سینے سے لگا لیا

خیال رہے کہ عید الاضحیٰ کے پہلے روز سویڈن کے دارالحکومت کی ایک مرکزی مسجد کے سامنے عراق سے تعلق رکھنے والے 37 سالہ پناہ گزین سلوان مومیکا نے قرآن پاک کو آگ لگانے کی جسارت کی تھی۔

سلوان مومیکا نے یہ ناپاک جسارت پولیس اور سیکیورٹی فورسز کے حفاظتی حصار میں انجام دی۔

ایک طرف تو سویڈن پولیس کا کہنا تھا کہ قرآن کو نذر آتش کرنے والے شخص پر ایک نسلی یا قومی گروہ کے خلاف اشتعال انگیزی کا مقدمہ درج کرلیا گیا۔

یہ خبر پڑھیں : سویڈن میں عید گاہ کے باہر قرآن پاک کا نسخہ نذرآتش

جب کہ دوسری جانب ملعون سلوان مومیکا نے آئندہ 10 دنوں میں سویڈن میں عراق کے سفارتخانے کے سامنے عراق کے جھنڈے سمیت قرآن کا نسخہ دوبارہ نذر آتش کرنے کا اعلان کیا ہے۔

خیال رہے کہ قرآن پاک کی بے حرمتی پر مسلم ممالک میں غم و غصے کی لہر دوڑ گئی تھی اور چند ممالک نے اپنے سفیروں کو سوئیڈن سے واپس بلا لیا جب کہ کئی ممالک نے سویڈن کے سفیر کو طلب کرکے احتجاج بھی ریکارڈ کروایا۔

یہ بھی پڑھیں : قرآن پاک کی بے حرمتی؛ بغداد میں مظاہرین کا سوئیڈش سفارتخانے پر دھاوا

عراق میں سویڈن کے سفارتخانے کے سامنے مقتدیٰ الصدر کے ہزاروں حامیوں نے مظاہرہ کیا اور سویڈن کے ساتھ سفارتی تعلقات ختم کرنے کا مطالبہ کیا۔