قومی کرکٹ ٹیم کے کپتان مصباح الحق 40 برس کے ہوگئے

لاہور: کپتان مصباح الحق قومی کرکٹ تربیتی کیمپ میں شریک کھلاڑیوں کے جھرمٹ میں اپنی40ویں سالگرہ کا کیک کاٹ رہے ہیں، بڑھتی عمر کے باوجود ان کی فٹنس قابل رشک ہے۔

---

قومی ٹیم کے کپتان اور مسٹر ٹُک ٹُک کے نام سے مشہور مستقل مزاج بلے باز مصباح الحق 40 برس کے ہوگئے۔

1974ء کو آج ہی کے روز میانوالی میں پیدا ہونے والے مصباح الحق کا تعلق نیازی پٹھان قبیلے سے ہے۔ وہ قومی کرکٹ ٹیم کے ان چند کھلاڑیوں میں سے ایک ہیں جو اعلیٰ تعلیم یافتہ ہیں، انہوں نے لاہور کی یونیورسٹی آف میجمنٹ اینڈ ٹیکنالوجی سے ایم بی اے کی ڈگری حاصل کررکھی ہے۔

مصباح الحق نے کرکٹ کیرئیر کا آغاز8 مارچ 2001ء میں نیوزی لینڈ کی کرکٹ ٹیم کے خلاف ٹیسٹ میچ کھیلتے ہوئے کیا تاہم 2007 میں انضمام الحق کی ریٹائرمنٹ کے بعد ٹیم میں ان کی جگہ بن سکی، پاک بھارت سیریز اور پہلے عالمی ٹی ٹوئنٹی ورلڈ کپ میں ان کی شاندار کارکردگی کی بنیاد پر ان کی ٹیم میں جگہ پکی ہوئی، 2010 میں دورہ انگلینڈ کے دوران میچ فکسنگ اسکینڈل کے منظر عام پر آنے کے بعد قومی ٹیم کا مورال انتہائی پست تھا اس موقع پر انہیں قومی ٹیم کی قیادت سونپی گئی اور گزشتہ 4 برس سے وہ ٹیسٹ اور ون ڈے فارمیٹ میں قومی ٹیم کے کپتان ہیں۔

مصباح الحق نے 46 ٹیسٹ میچز میں 5 سنچریوں اور 25 نصف سنچریوں کی مدد سے 48.75 کی اوسط سے 3ہزار 218 جبکہ 146 بین الاقوامی ون ڈے میچز میں 37 نصف سنچریوں کی مدد سے 44.38 کی رنز اوسط سے 4ہزار 527 رنز بنائے ہیں ، اس کے علاوہ انہوں نے39 ٹی 20 انٹرنیشنل میں پاکستان کی نمائندگی کرتے ہوئے 37.52 رنز کی بہترین رنز اوسط کے ذریعے 788 رنز بھی بنائے ہیں۔ مصباح وہ واحد کپتان ہیں جس کی قیادت میں کسی بھی ایشیائی ٹیم نے جنوبی افریقا کو اس کی سرزمین پر ون ڈے سیریز ہرائی۔