کراچی کے بعض علاقوں میں بارش آئندہ 24گھنٹوں مزید بادل برسنے کا امکان
طاقتور مون سون ہواؤں کا سلسلہ صوبے کے شمالی/وسطی علاقوں پر اثرانداز ہو رہا ہے
شہر قائد کے مختلف علاقوں میں ہلکی اور تیز بارش سے موسم خوش گوار ہوگیا، آئندہ 24 گھنٹوں کے دوران گرج چمک کے ساتھ مزید بارش کا امکان ہے۔
تفصیلات کے مطابق گلشن معمار، سرجانی ٹاؤن، ناگن چورنگی، اورنگی ٹاؤن، نارتھ کراچی، یوپی موڑ، بفرزون اور عزیر آباد سمیت اطراف کے علاقوں میں بارش ہوئی۔
محکمہ موسمیات کے مطابق طاقتور مون سون ہواؤں کا سلسلہ صوبے کے شمالی/وسطی جبکہ بلوچستان کے مشرقی و شمال مشرقی علاقوں پر اثرانداز ہو رہا ہے۔
پیر اور منگل کو موسم زیادہ تر ابرآلود اور ہلکی بارش کا امکان رہے گا۔ موسلادھار بارشوں کی وجہ سے دیہی سندھ کے نشیبی علاقوں میں پانی جمع ہوسکتا ہے۔
کراچی میں سمندری ہوائیں بحال ہیں جبکہ واؤں کی رفتار 30 کلومیٹر فی گھنٹہ تک تجاوز کرسکتی ہے۔ شہر میں بادلوں کے ڈیرے بھی ہیں اور مختلف علاقوں میں ہلکی بارش سے موسم خوشگوار ہے۔
آج کم سے کم درجہ حرارت 27.5 ڈگری سینٹی گریڈ ریکارڈ ہوا جبکہ زیادہ سے زیادہ درجہ حرارت 32 ڈگری سینٹی گریڈ رہنے کا امکان ہے۔
