اسلام آباد: انسداد منشیات عدالت نے منشیات اسمگل پر میاں بیوی کو 20 اور بارہ سال تیسرے مجرم کو 9 برس قید کی سزا سنادی، ملزمان پر 12 لاکھ روپے جرمانہ بھی کیا گیا۔
ایکسپریس نیوز کے مطابق کیس کی سماعت انسداد منشیات عدالت کے جج راجہ جواد عباس حسن نے کی، اے این ایف نے گزشتہ سال مبشر حسین، رحمان اقبال اور مسماۃ زاہدہ سے ساڑھے 71 کلو افیون برآمد کی تھی۔
عدالت نے مبشر حسین کو 20 سال قید 8 لاکھ روپے جرمانہ، رحمان اقبال کو 9 سال قید ایک لاکھ روپے جرمانے کی سزا سنائی،عدالت نے خاتون ملزمہ مسماۃ زاہدہ پروین کو 12 سال قید اور 3 لاکھ روپے جرمانہ کی سزا کا حکم سنایا ہے۔
پراسیکیوٹر فہد ملک کے مطابق تین رکنی گروہ کے قبضے سے موقع سے افیون برآمد کی گئی، گروہ جس گاڑی میں منشیات اسمگل کر رہا تھا وہ بھی قبضے میں کرلی گئی، لیبارٹری کی رپورٹ بھی مثبت آئی اور ملزمان نے منشیات اسمگل کرنے کے حوالے سے تسلیم بھی کیا۔