کراچی:
عوامی نیشنل پارٹی (اے این پی) سندھ کے صدر شاہی سید نے کہا ہے کہ ڈمپرز اور ہیوی ٹرانسپورٹ کراچی کی ترقی میں اہم کردار ادا کررہا ہے۔
شاہی سید نے اپنے جاری کردہ بیان میں کہا کہ ڈمپرز و دیگر ہیوی ٹرانسپورٹ کا شہر کراچی کی تعمیر وترقی میں اہم کردار ہے ، ہیوی ٹرانسپورٹ کا شہر میں داخلہ بند کرنا مسئلے کا حل نہیں، حکمران مسئلے کا حل نکالیں تاکہ حادثات کو روکا جاسکے، قیمتی جانوں کے ناقابل تلافی نقصان سے بھی بچ جائیں اور ڈمپرز و دیگر ہیوی ٹرانسپورٹ کراچی کی تعمیر و ترقی میں اپنا کردار جاری رکھ سکیں۔
انہوں کہا کہ بعض عناصر مسئلے کو سیاسی بیانیہ اور لسانیت کا رنگ دینے کی کوشش کی جا رہی ہے ، کراچی ہم سب کا ہے کسی کو کراچی کے حالات خراب کرنے کی اجازت نہیں دی جائیگی۔
شاہی سید نے کہا کہ قانونی طور پر کسی شہری کو کسی گاڑی کے کاغذات یا اس کے ڈرائیور کے لائسنس کی جانچ پڑتال کرنے کا کوئی حق حاصل نہیں ہے، یہ اختیار صرف متعلقہ سرکاری اداروں کو حاصل ہے۔
انہوں کہا کہ وزیر اعلی سندھ ، آئی جی سندھ، وزیر داخلہ، وزیر ٹرانسپورٹ اور دیگر قانون نافذ کرنے والے ادارے ومتعلقہ حکام بالا سازشوں کا نوٹس لیں،کراچی کا امن برقرار اور ٹرانسپورٹرز کو تحفظ فراہم کیا جائے۔