پاکستانی ٹیلی ویژن انڈسٹری کے نامور اداکار عرفان کھوسٹ نے سینئر اداکار فردوس جمال کے حالیہ متنازع بیانات کی اصل وجہ بتادی۔
فردوس جمال، جو اپنے کیریئر میں کئی یادگار کرداروں کےلیے جانے جاتے ہیں، حالیہ عرصے سے اپنے بیانات اور خاندانی تنازعات کی وجہ سے خبروں میں رہے ہیں۔
عرفان کھوسٹ نے حال ہی میں ایک انٹرویو میں فردوس جمال کے بارے میں اپنی رائے کا اظہار کرتے ہوئے کہا ’’فردوس جمال ایک شاندار اور محنتی فنکار ہیں، لیکن مجھے لگتا ہے کہ وہ ڈپریشن کا شکار رہے ہیں۔ اس عمر میں اگر انسان تنہا رہتا ہے، تو اس کے مزاج میں تلخی آجاتی ہے۔‘‘
سینئر اداکار نے مزید کہا کہ انہوں نے فردوس جمال کو پیار سے سمجھایا تھا کہ ہمیں اپنے ساتھی اداکاروں کو جج کرنے کا کوئی حق نہیں ہے۔ انہوں نے کہا ’’ان میں کچھ خاص ہے، تبھی وہ انڈسٹری میں موجود ہیں، ورنہ وہ یہاں نہ ہوتے۔‘‘
عرفان کھوسٹ نے نوجوان اداکاروں کے رویے پر بات کرتے ہوئے کہا، ’’اگر نوجوان اداکار ہمیں بزرگ یا سینئر سمجھ کر ہمارا احترام کرتے ہیں، تو یہ اچھی بات ہے۔ لیکن اگر وہ ایسا نہیں کرتے، تو بھی ٹھیک ہے۔ ہمیں اس پر بھڑکنا نہیں چاہیے۔ ہم اپنی رائے کو ان پر مسلط نہیں کرسکتے۔‘‘
انھوں نے یوٹیوبرز کے غیر ذمے دارانہ سوالات پر ناراضی کا اظہار کرتے ہوئے کہا، ’’سوال کرنے والے خود بھی تیلی لگاتے ہیں اور وائرل کانٹینٹ بنانے کےلیے جان بوجھ کر ایسے سوالات کرتے ہیں۔‘‘
عرفان کھوسٹ پاکستان ٹیلی ویژن کی مقبول اور نمایاں ترین شخصیات میں سے ایک ہیں۔ انہوں نے اپنی غیر معمولی اداکاری اور متنوع پرفارمنس سے خود کو ایک باصلاحیت فنکار کے طور پر منوایا ہے۔ ان کے قابل ذکر ڈراموں میں ’’باغی‘‘، ’’اندھیرا اُجالا‘‘، ’’سمی‘‘، ’’مہربان‘‘، ’’خدا اور محبت 2‘‘، ’’آؤ کہانی بنتے ہیں‘‘، ’’شاشلک‘‘، ’’انا’’، ’’صدقے تمہارے‘‘، اور ’’دو اور دو چار‘‘ شامل ہیں۔
عرفان کھوسٹ معروف ہدایت کار اور اداکار سرمد کھوسٹ کے والد بھی ہیں، جنہوں نے ’’ہمسفر‘‘، ’’پانی جیسا پیار‘‘، اور ’’شہرِ ذات‘‘ جیسے مقبول ڈراموں کی ہدایت کاری کرکے شہرت حاصل کی ہے۔
