کراچی:
سندھ کابینہ نے اسمبلی سے منظور شدہ بلز پر گورنر کے اعتراضات مسترد کردیے، بلز دوبارہ اسمبلی میں پیش ہونگے، کابینہ نے پیر سے اسلحہ کی نمائش، غیر رجسٹرڈ گاڑیوں، بغیر ڈرائیونگ لائسنس گاڑیاں چلانے والوں کے خلاف سخت کارروائیوں اور گرفتاریوں کا فیصلہ کیا ہے۔
ایکسپریس نیوز کے مطابق سندھ کابینہ کا اجلاس وزیراعلیٰ سندھ سید مراد علی شاہ کے زیر صدارت منعقد ہوا۔ اجلاس میں مختلف معاملات کی منظوری دی گئی۔
اجلاس کے بعد میڈیا کو بریفنگ دیتے ہوئے شرجیل میمن نے کہا کہ امل عمر ایکٹ سندھ اسمبلی نے پاس کیا تھا، امل عمر بل قانون ہے سب اسپتالوں پر لاگو ہے، کسی کو کوئی گن شاٹ ہوجائے یا ایکسیڈنٹ ہوجائے تو آپ پرائیویٹ اسپتال میں بھی جاسکتے ہیں، امل عمر ایکٹ کے تحت ایمرجنسی کیسز میں کسی بھی پرائیویٹ سپتال جا سکتے ہیں اس کے پیسے سندھ حکومت بھرے گی اور کوئی پولیس سرٹیفکیٹ نہیں مانگا جائے گا۔
انہوں نے کہا کہ سندھ اسمبلی سے جو بل پاس ہوا تھا اس پر گورنر سندھ نے اعتراض لگایا تھا، کابینہ نے تمام اعتراضات کو مسترد کردیا پیر کو پھر اسمبلی میں بلز لائے جائیں گے کچھ بل تو ایسے تھے جن میں ایم کیو ایم کی رائے بھی شامل تھی، گورنر کے مختلف چیزوں پر اعتراض تھے گورنر صاحب کے اعتراضات قابل احترام ہیں مگر یہ جمہوریت ہے اور کابینہ کی رائے گورنر سے مختلف ہے۔
انہوں ںے بتایا کہ دو دن بعد ہتھیاروں کی نمائش پر سختی کی جائے گی، جس کے پاس بھی اسلحہ نظر آیا وہ گرفتار ہوجائے گا، غیر رجسٹرڈ گاڑیوں پر بھی پیر سے سختی کی جائے گی، شوروم سے اَن رجسٹرڈ گاڑی باہر نہیں نکل سکے گی، گاڑیوں کی فٹنس بھی بہت لازم ہے، ہم نے ٹرانسپوٹرز سے بھی ملاقاتیں کی ہیں اور انہوں نے یقین دلایا کہ جتنے بھی قوانین بنیں گے اس پر عمل کیا جائے گا، بغیر ڈرائیونگ لائسنس اور کم عمر بچوں کو گاڑی چلانے نہیں دی جائے گی۔
جامعات کے وائس چانسلرز کے معاملے پر انہوں نے کہا کہ جو بھی شخص اہلیت رکھتا ہوگا تو وہ وی سی بنے گا، ہر پاکستانی وائس چانسلر بن سکتا ہے۔
شرجیل میمن کا کہنا تھا کہ شہر میں کام تیزی سے ہورہا ہے، کراچی میں دو سو سے زائد ای وی گاڑیاں ہیں جو کچرا اٹھاتی ہیں شہر میں ترقیاتی کاموں کے باعث جو شہریوں کو مشکلات درپیش ہیں اس کی مختلف وجوہات ہیں۔
وزیر اطلاعات کا مزید کہنا تھا کہ کوئی بھی سیکیورٹی گارڈ گاڑی کے اندر بیٹھے گا، سیکیورٹی گارڈز، ڈالوں میں نہیں بیٹھیں گے گارڈز کو گاڑیوں کے اندر بیٹھنا ہوگا۔
انہوں نے مزید کہا کہ انفلوئنزا بیماری پاکستان سمیت دیگر ممالک میں تیزی سے بڑھ رہی ہے، تمام پاکستانیوں سے گزارش ہے کہ سوشل ڈسٹنس رکھیں ہاتھ نہ ملائیں، اس بیماری سے لنگس بھی متاثر ہوسکتے ہیں، احتیاط کریں۔