بالی ووڈ کے معروف کامیڈین راجپال یادیو بھی پاکستانی لیجنڈز عمر شریف اور معین اختر کے مداح نکلے۔
راجپال یادیو نے پاکستانی یوٹیوبر نادر علی کے پوڈ کاسٹ میں شرکت کے دوران عمر شریف اور معین اختر کی تعریف کرتے ہوئے کہا کہ وہ ان کے بڑے مداح ہیں۔
راجپال کا کہنا تھا کہ عمر شریف اور معین اختر اپنے فن کے بادشاہ تھے۔ انہوں نے اپنی تخلیقی صلاحیتوں کے ذریعے اسکرین پر ایسی یادگار پرفارمنس دیں کہ دیکھنے والے ایک لمحے کےلیے بھی اسکرین نہیں چھوڑ سکتے تھے۔ انہوں نے خاص طور پر ’’لوز ٹاک‘‘ جیسے پروگراموں کی تعریف کی، جہاں ہر مکالمہ برجستہ اور بے مثال ہوتا تھا۔
راجپال نے مزید کہا، ’’ہم عمر شریف کی آڈیو کیسٹ سنتے تھے، کیونکہ وہ قدرتی طور پر تخلیقی صلاحیتوں سے مالا مال تھے۔ وہ واقعی میں ایک بڑے اسٹار تھے۔‘‘
راجپال یادیو نے یہ بھی کہا کہ وہ جب سے فلموں میں آئے ہیں، انہوں نے یہ فیصلہ کیا ہے کہ وہ کسی ایسی فلم میں کام نہیں کریں گے جس میں کسی دوسرے ملک کو بُرا دکھایا جائے۔ انہوں نے کہا، ’’ہم صرف سینما کی بات کرتے ہیں اور چاہتے ہیں کہ دونوں ملکوں کے تعلقات بہتر رہیں۔‘‘
جب نادر علی نے سوال کیا کہ بالی وڈ فلموں میں پاکستانیوں کو منفی کرداروں میں کیوں دکھایا جاتا ہے، تو راجپال نے جواب دیا، ’’اگر سال میں 500 فلمیں بنتی ہیں، تو ان میں سے صرف 2 فلمیں ایسی ہوتی ہیں۔ زیادہ تر فلمیں مثبت پیغام دیتی ہیں۔‘‘
جب راجپال یادیو سے پاکستان کے پسندیدہ شہر کے بارے میں پوچھا گیا، تو انہوں نے لاہور کا نام لیا۔ انہوں نے کہا کہ وہ پشاور شہر بھی دیکھنا چاہیں گے۔
راجپال نے اپنے کیریئر کے بارے میں بات کرتے ہوئے کہا کہ کسی اداکار کےلیے یہ کہنا مشکل ہے کہ اس کا پسندیدہ کردار کون سا ہے۔ تاہم، انہوں نے فلم ’’چھپ چھپ کے‘‘ میں اپنے کردار کو سراہا، جس پر آج تک بہت زیادہ میمز بنتی ہیں۔ انہوں نے کہا کہ انہیں سب سے زیادہ معاوضہ بھی اسی فلم کا ملا۔
انہوں نے ڈائریکٹرز ڈیوڈ دھون اور پریا درشن کی تعریف کرتے ہوئے کہا کہ ان کی بدولت ہی اداکار کو اس کا مقام مل پاتا ہے۔ انہوں نے فلم ’’میری پتنی اور وہ‘‘ میں اپنے مرکزی کردار کو بھی اپنی بہترین پرفارمنس میں سے ایک قرار دیا۔
راجپال یادیو نے اپنے حالیہ پروجیکٹس کے بارے میں بتایا کہ وہ فلم ’’بھوت بنگلہ‘‘ میں کام کر رہے ہیں۔ انہوں نے یہ بھی تصدیق کی کہ فلم ’’ہیرا پھیری 3‘‘ بننے جارہی ہے۔