پاکستان کو اپنے دفاع کے لیے اقدامات کا پورا حق حاصل ہے، وزیراعظم کی سعودی وزیر خارجہ سے گفتگو

وزیراعظم شہباز شریف نے سعودی عرب کے وزیرمملکت برائے خارجہ عادل الجبیر سے کہا ہے کہ پاکستان اپنی خودمختاری اور علاقائی سالمیت کے دفاع کے لیے مکمل طور پر پرعزم ہے اور اُسے اپنے دفاع کے لیے اقدامات کا پورا حق حاصل ہے۔

وزیراعظم آفس سے جاری اعلامیے کے مطابق وزیراعظم شہباز شریف سے سعودی وزیر مملکت برائے خارجہ امور عادل الجبیر نے اسلام آباد میں ملاقات ہوئی کی، سعودی وزیر پاکستان کے ایک روزہ سرکاری دورے پر اسلام آباد پہنچے۔

ملاقات کے دوران وزیر اعظم نے خادم الحرمین شریفین شاہ سلمان بن عبد العزیز السعود کے ساتھ ساتھ ولی عہد اور وزیر اعظم محمد بن سلمان بن عبد العزیز السعود کے لیے نیک خواہشات کا اظہار کیا۔

وزیرِاعظم نے پاکستان اور سعودی عرب کے دیرینہ برادرانہ تعلقات کے مزید فروغ پر اطمینان کا اظہار کیا اور ہر مشکل وقت میں پاکستان کی غیر متزلزل حمایت کرنے پر سعودی عرب کا شکریہ ادا کیا۔

جنوبی ایشیا کے موجودہ حالات پر تبادلہ خیال کرتے ہوئے وزیر اعظم شہباز شریف نے بھارت کے پاکستان کے خلاف میزائل اور ڈرون حملوں کی شدید الفاظ میں مذمت کی، جس کی وجہ سے کئی بے گناہ شہری بشمول خواتین اور بچوں کی شہادت واقع ہوئی اور املاک کو نقصان پہنچا۔

انہوں نے اس بات پر زور دیا کہ بھارت کی بلااشتعال اور بلا جواز جارحیت پاکستان کی خودمختاری اور علاقائی سالمیت کی کھلی خلاف ورزی ہے اور اس جارحیت سے علاقائی امن و استحکام کو شدید خطرات لاحق ہیں۔

وزیر اعظم نے پاکستان کی بہادر افواج کو خراج تحسین پیش کیا جنہوں نے دفاع وطن میں مثالی حوصلے اور جرات کا مظاہرہ کیا اور دشمن کے ناپاک عزائم خاک میں ملا دیے۔

وزیراعظم نے کہا کہ پاکستان اپنی خودمختاری اور علاقائی سالمیت کے دفاع کے لیے مکمل طور پر پرعزم ہے اور اسے اقوام متحدہ کے چارٹر کے آرٹیکل 51 کے مطابق اپنے دفاع کے لیے اقدامات لینے کا پورا پورا حق حاصل ہے۔

وزیرِاعظم نے خطے میں کشیدگی کم کرنے اور علاقائی امن قائم کرنے کے لیے سعودی حکومت کی سفارتی کوششوں کو سراہا۔

سعودی وزیر مملکت نے پاکستانی شہریوں کی قیمتی جانوں کے ضیاع پر دلی تعزیت کا اظہار کیا اور انہوں نے کہا کہ سعودی عرب کو جنوبی ایشیا کے موجودہ حالات پر گہری تشویش ہے۔

سعودی وزیر خارجہ نے سعودی ولی عہد محمد بن سلمان کا خصوصی پیغام بھی پاکستانی قیادت کو پہنچایا اور ملاقات میں دونوں طرف سے پاک-سعودی تعلقات کو مزید مضبوط اور بڑھانے پر بھی اتفاق ہوا۔

انہوں نے سعودی عرب کی جانب سے کشیدگی میں کمی کے ساتھ ساتھ پاکستان اور بھارت کے درمیان تمام تصفیہ طلب تنازعات کو بین الاقوامی قوانین اور اقوام متحدہ کی سلامتی کونسل کی متعلقہ قراردادوں کے مطابق حل کرنے کے مطالبے کا اعادہ کیا۔

سعودی وزیر خارجہ کی وزیراعظم سے اہم ملاقات کے دوران نائب وزیراعظم اسحاق ڈار، وفاقی وزیر داخلہ محسن نقوی، وفاقی وزرا اور آرمی چیف جنرل عاصم منیر بھی موجود تھے۔

وزیراعظم نے ملاقات کے بعد سعودی وزیر خارجہ کے اعزاز میں عشائیہ کا بھی اہتمام کیا، ملاقاتیں کرکے سعودی وزیر خارجہ واپس اپنے وطن روانہ ہوگئے۔

قبل ازیں نائب وزیراعظم اور وزیرخارجہ اسحاق ڈار نے وزارت خارجہ اسلام آباد میں سعودی عرب کے وزیرمملکت برائے خارجہ امور کا خیرمقدم کیا۔

ترجمان دفترخارجہ نے بتایا کہ دونوں رہنماؤں نے دوطرفہ تعلقات، پاکستان اور سعودی عرب کے درمیان پائیدار برادرانہ تعلقات کو مزید بہتر کرنے کے عزم کا اعادہ کیا اور انہوں نے علاقائی پیش رفت پر بھی تبادلہ خیال کیا۔

اس موقع پر نائب وزیراعظم اسحاق ڈار نے خطے میں امن اور استحکام کے فروٖ کے لیے سعودی عرب کی تعمیری سفارتی کوششوں کو سراہا۔

بعد ازاں سعودی وزیرمملکت برائے خارجہ وزیراعظم سے ملاقات کے لیے وزیراعظم ہاؤس پہنچے اور دونوں رہنماؤں نے دوطرفہ تعلقات سمیت خطے میں کشیدگی پر تبادلہ خیال کیا۔

قبل ازیں اسلام آباد میں سعودی عرب کے وزیرمملکت برائے خارجہ عادل الجبیر کا پاکستان میں سعودی سفیر اور وزارت خارجہ کے اعلیٰ حکام نے استقبال کیا۔

سعودی عرب کے وزیر مملکت برائے خارجہ نے دفتر خارجہ میں نائب وزیر اعظم اسحاق ڈار سے ملاقات کی اور ملاقات میں پاک-بھارت کشیدگی پر تفصیلی تبادلہ خیال کیا گیا۔

سعودی وزیر مملکت برائے خارجہ عادل الجبیراس سے قبل بھارت کے دورے پر تھے اور نئی دہلی سے اسلام آباد پہنچے اور یہاں ملاقاتیں کرکے واپس سعودی عرب روانہ ہوگئے۔