وفاقی وزیر پیٹرولیم علی پرویز ملک نے کہا ہے کہ وزیراعظم شہباز شریف اور آرمی چیف فیلڈ مارشل سید عاصم منیر خود پاکستان میں کان کنی کے شعبے کی ترقی کی قیادت کر رہے ہیں۔
انہوں نے یہ بات حکومت پاکستان اور امریکی سفارت خانے کے تعاون سے امریکی سرمایہ کاروں میں پاکستان کے کان کنی کے شعبے میں سرمایہ کاری کو فروغ دینے کے لیے منعقدہ ویبنار سے خطاب کرتے ہوئے کہی۔
وفاقی وزیر پیٹرولیم علی پرویز ملک اور امریکی ناظم الامور نیٹالی بیکر نے اسلام آباد میں ویبنار کی مشترکہ میزبانی کی۔
علی پرویز ملک نے کہا کہ وزیراعظم شہباز شریف اور آرمی چیف فیلڈ مارشل سید عاصم منیر خود پاکستان میں کان کنی کے شعبے کی ترقی کی قیادت کر رہے ہیں۔
ویبنار کا مقصد پاکستان کے معدنیات اور کان کنی کے شعبے میں پرکشش سرمایہ کاری کے مواقع کو امریکی سرمایہ کاروں اور کمپنیوں تک پہنچانا تھا، امریکی سفارتکاروں ، پاکستانی منرل کمپنیوں اور متعدد امریکی کاروباری نمائندوں نے آن لائن ویبنار میں حصہ لیا۔
علی پرویز ملک نے امریکی کمپنیوں کو پبلک پرائیویٹ پارٹنرشپ اور مشترکہ منصوبوں میں سرمایہ کاری کی دعوت دی اور کہا کہ معدنیات کی کان کنی کو سپورٹ کرکے اور کاروبار میں آسانی کو ممکن بنا کر صاف توانائی پر منتقلی کو فروغ دے رہے ہیں۔
امریکی ناظم الامور نیٹالی بیکر نے امریکہ اور پاکستان کے درمیان طویل المدتی معاشی شراکت داری کا اعادہ کیا اور کہا کہ امریکی سرمایہ کاروں کے لیے پاکستان کے معدنیات کے شعبے میں مواقع ایکسپلور کرنے کا یہ صحیح وقت ہے، امریکی سرمایہ کاروں کو پاکستان کے منرل شعبے میں سرمایہ کاری کے لیے سفارت خانہ سپورٹ فراہم کرے گا۔
ان کا مزید کہنا تھا کہ امریکی سرمایہ کاروں نے طویل عرصے سے پاکستان کی ترقی میں اہم کردار ادا کیا ہے، منرلز کے شعبے میں شراکت داری کی بڑی امیدیں نظر آ رہی ہیں، پاکستان کے اس پائیدار ترقی کے سفر میں امریکہ کے لیے مشترکہ مواقع ہیں اور پاکستان کی صلاحیت پر یقین ہے۔
