رخشان ڈویژن کے شہر دالبندین میں جرگے کا انعقاد کیا گیا جس میں علاقائی مسائل، ترقیاتی منصوبوں پر گفتگو اور اہم اعلانات کیے گئے۔
رپورٹ کے مطابق جرگے میں گورنر بلوچستان جناب جعفر خان مندوخیل، وزیر اعلیٰ بلوچستان میر سرفراز بگٹی، کمانڈر بلوچستان کور لیفٹیننٹ جنرل راحت نسیم احمد خان، صوبائی وزراء, اعلٰی سول و عسکری حکام علاقائی عمائدین، خواتین، طلباء اور عوام کی بڑی تعداد نے شرکت کی۔
جرگے کا آغاز یادگارِ شہداء پر پھولوں کی چادر چڑھانے اور فاتحہ خوانیسے ہوا، جرگے میں شرکاء نے قبائلی عمائدین، خواتین اور نوجوانوں سے ملاقات کی، ان کے مسائل سنے۔
وزیر اعلیٰ بلوچستان میر سرفراز بگٹی نے کہا کہ رخشان ڈویژن بلوچستان اور پاکستان کا دل ہے، یہاں قدرتی وسائل اور معدنی ذخائر کی موجودگی اسے غیر معمولی اہمیت کا حامل بناتی ہے۔
وزیر اعلیٰ نے مزید کہا کہ ریکوڈک منصوبے کا 25 فیصد منافع بلوچستان کو حاصل ہوگا، اس منصوبے میں تمام غیر ہنر مند ملازمین بلوچستان سے رکھے گئے ہیں۔
رخشان ڈویژن کے تمام سرکاری ڈگری کالجز کے بی ایس پروگرام کے طلبہ کے لیے لیپ ٹاپس فراہم کی جائے گی، قبائلی رہنماؤں نے بلوچستان میں قیامِ امن کے لیے قانون نافذ کرنے والے اداروں کے کردار کو سراہا۔
