متحدہ کا وفد جمعرات کو وزیر اعظم کی دعوت پر ان سے ملاقات کرے گا اعلامیہ ایم کیو ایم

ایم کیو ایم نے وفاقی حکومت کی جانب سے دی گئی دعوت قبول کرلی، اعلامیہ فوٹو: فائل

---

ایم کیو ایم کے اعلامیے کے مطابق وفاقی حکومت کی جانب سے متحدہ قومی موومنٹ سے اعلیٰ ترین سطح پر رابطہ کیا گیا جس میں انہیں وزیر اعظم نواز شریف سے ملاقات کی دعوت دی گئی جسے ایم کیو ایم کی اعلیٰ قیادت نے قبول کرلیا۔

ایم کیو ایم کی جانب سے جاری اعلامیے کے مطابق وفاقی حکومت کے اہم رہنماؤں نے ایم کیو ایم سے اعلیٰ سطح پر رابطہ کیا جس میں انہیں موجودہ سیاسی صورتحال کے حوالے سے وزیر اعظم نواز شریف سے ملاقات کی باضابطہ دعوت دی گئی جسے ایم کیو ایم کی اعلیٰ قیادت نے قبول کرلیا اور جمعرات کو ایم کیو ایم کا وفد ایوان وزیر اعظم میں نواز شریف سے ملاقات کرے گا۔

دوسری جانب عوامی مسلم لیگ کے سربراہ شیخ رشید اور پیپلزپارٹی کے رہنما رحمان ملک نے ایم کیوایم کے قائد الطاف حسین سے ٹیلی فونک رابطہ کیا جس میں ملکی موجودہ سیاسی صورتحال اور اسلام آباد میں آئندہ چند روز میں ہونے والے اجتماعات سمیت دیگر اہم سیاسی امور پر تفصیلی تبادلہ خیال کیا گیا۔

واضح رہے کہ ملک کا سیاسی درجہ حرارت اس وقت اپنے عروج پر ہے، ایک جانب عمران خان نے 14 اگست کو آزادی مارچ کا اعلان کر رکھا ہے تو دوسری جانب طاہر القادری نے حکومت کے خلاف دوسرا محاذ کھول رکھا ہے اور دونوں جماعتوں نے اگست کو حکومت کا آخری مہینہ قرار دیا ہے، اس تمام تر صورتحال سے نپٹنے کے لئے مسلم لیگ (ن) اور حکومتی نمائندے مختلف سیاسی جماعتوں سے رابطے کر رہے ہیں جبکہ اس سلسلے میں وزیر اعظم نواز شریف نے قومی اسمبلی میں قائد حزب ختلاف سید خورشید شاہ، مولانا فضل الرحمان، آفتاب احمد خان شیرپاؤ سے ملاقات کی جبکہ دیگر وزرا بھی مختلف سیاسی جماعتوں سے رابطے کر رہے ہیں۔