
راولپنڈی کے تھانہ پیرودھائی کے علاقے میں غیرت کے نام پر قتل کی گھناؤنی واردات سامنے آئی ہے جہاں خاوند نے رشتہ داروں کے ساتھ مل کر اہلیہ کو قتل کرکے لاش خاموشی سے دفنا دی۔
پولیس نے تحقیقات کے دوران سنگین واردات کا سراغ لگا لیا اور گورکن سمیت ملوث ملزمان کو گرفتار کرلیا۔
ذرائع نے کہا کہ ملزمان اتنے شاطر نکلے کے خود ہی لڑکی کے اغوا اور دوسری جگہ نکاح کرنے کا مقدمہ بھی درج کرادیا، مقدمہ لڑکی کے خاوند ضیا الرحمان کی مدعیت میں درج کیا گیا۔
مدعی نے کہا کہ پیرو دھائی کا رہائشی ہوں اور باڑہ مارکیٹ میں کپڑے کی دکان پر سیلزمین ہوں، شادی جنوری میں مسماتہ سدرہ گل سے ہوئی، 11 جولائی کو گھر آیا تو اہلیہ معمولی ناچاقی پر گھر سے زیور و نقدی لے کر غائب تھی، تلاش کیا تو پتہ چلا کہ اس نے عثمان نامی شخص سے شادی کرلی، عثمان کو بھی پتہ تھاکہ وہ شادی شدہ ہے، اس کے گھر والوں سے بات کی تو عثمان کا کچھ نہ بتایا۔
ذرائع نے کہا کہ پولیس نے مدعی کی درخواست پر ایف آئی آر درج کرکے تحقیقات شروع کیں تو ہوش ربا انکشافات سامنے آئے، اطلاعات پر قریی قبرستان کے گورکن کو شامل تفتیش کیا گیا تو خاموشی سے لاش دفنانے کا انکشاف ہوا۔
ذرائع نے کہا کہ ملزمان نے نشانات مٹانے کے لیے قبر کے ںشانات بھی مٹا ڈالے، پولیس نے گورکن سمیت ملوث ملزمان کو گرفتار کرلیا، لاش بازیاب کرنے کے لیے عدالت سے رجوع کرلیا گیا۔
پولیس ذرائع نے کہا کہ ایف آئی آر میں قتل، غیرت کے نام پر قتل وغیرہ کی دفعات کا اضافہ کرلیا گیا ہے، مرکزی ملزم کی گرفتاری کے لیے چھاپے جاری ہیں۔