ڈیرہ اسماعیل خان میں سیکیورٹی فورسز نے پولیس ٹریننگ اسکول پر حملے کو ناکام بنادیا، مقابلے میں پانچ دہشت گرد مارے گئے جبکہ چھ پولیس اہل کار اور امام مسجد شہید، بارہ پولیس اہلکار اور ایک شہری زخمی ہوگئے۔
پاک فوج کے شعبہ تعلقات عامہ (آئی ایس پی آر) نے کہا ہے کہ جمعہ اور ہفتے 10 اور 11 اکتوبر 2025ء کی درمیانی شب بھارتی پراکسی گروپ "فتنہ الخوارج" سے تعلق رکھنے والے دہشت گردوں نے ڈیرہ اسماعیل خان کے ضلع میں پولیس ٹریننگ اسکول پر بزدلانہ حملہ کیا، دہشت گردوں نے اسکول کی حدود میں داخل ہونے کی کوشش کی تاہم وہاں موجود قانون نافذ کرنے والے اداروں کے مستعد اور بہادر اہل کاروں نے ان کے ناپاک عزائم کو بروقت ناکام بنا دیا جس پر مایوسی کے عالم میں دہشت گردوں نے دھماکا خیز مواد سے بھری گاڑی اسکول کے دروازے سے ٹکرا دی۔
آئی ایس پی آر نے کہا ہے کہ پولیس کے جوانوں نے غیر متزلزل جرأت اور پیشہ ورانہ مہارت کا مظاہرہ کرتے ہوئے حملہ آوروں کا بہادری سے مقابلہ کیا، جس کے نتیجے میں بھارتی پراکسی "فتنہ الخوارج" سے تعلق رکھنے والے تین دہشت گرد ہلاک ہوگئے، باقی دو دہشت گردوں کو عمارت کے ایک حصے میں گھیر کر سیکیورٹی فورسز نے ایک منظم کلیئرنس آپریشن کے دوران ہلاک کیا، شدید فائرنگ کے تبادلے میں پولیس کے چھ بہادر اہلکار مادرِ وطن کے دفاع میں جامِ شہادت نوش کر گئے جن میں تربیتی کیڈٹس بھی شامل تھے جب کہ بارہ پولیس اہلکار اور ایک معصوم شہری زخمی ہوئے۔
آئی ایس پی آر کے مطابق دہشت گردوں نے حملے کے دوران اسکول کمپلیکس کی مسجد کو بھی نشانہ بنایا جہاں انہوں نے نہ صرف مقدس مقام کی بے حرمتی کی بلکہ امام مسجد کو بھی شہید کردیا، علاقے میں سرچ اور صفائی کے آپریشن جاری ہیں اور اس بزدلانہ و سفاکانہ کارروائی کے مرتکبین کو کیفرِ کردار تک پہنچایا جائے گا۔
آئی ایس پی آر نے مزید کہا ہے کہ پاک سیکیورٹی فورسز اور قانون نافذ کرنے والے ادارے، پوری قوم کے ساتھ مل کر بھارتی سرپرستی میں ہونے والی دہشت گردی کے مکمل خاتمے کے لیے پُرعزم ہیں، ہمارے بہادر جوانوں اور معصوم شہریوں کی قربانیاں اس عزم کو مزید مضبوط کرتی ہیں، ہم وطنِ عزیز کے دفاع کے لیے ہر قیمت ادا کرنے کو تیار ہیں۔
دریں اثنا حملے کے وقت فائرنگ اور دھماکوں کی آوازیں بھی سنائی دیتی رہیں۔
پولیس حکام کے مطابق آپریشن رات گئے مکمل کیا گیا جس میں پولیس اور دیگر سیکورٹی اداروں نے مشترکہ طور پر حصہ لیا۔ دہشتگردوں نے رات تقریباً ساڑھے 8 بجے حملہ کیا تاہم فورسز نے فوری جوابی ایکشن لے کر انہیں ٹریننگ اسکول کی حدود میں ہی گھیر لیا۔
ڈی جی پبلک ریلیشنز خیبر پختونخوا کے مطابق حملے کے وقت ٹریننگ اسکول میں موجود تقریباً 200 پولیس ریکروٹس اور اہلکاروں کو بحفاظت نکال لیا گیا۔ آپریشن کے دوران نادرا آفس اور اسکول کے تمام بلاکس کو کلیئر قرار دیا گیا۔
وزیر داخلہ کا اظہار تعزیت
دوسری جانب وفاقی وزیرداخلہ محسن نقوی نے پولیس ٹریننگ سینٹر پر خوارجی دہشتگردوں کے حملے کی مذمت کی ہے۔ انہوں نے دہشتگردوں کا مقابلہ کرتے ہوئے جام شہادت نوش کرنے والے 7 پولیس اہلکاروں کو خراج عقیدت پیش کرتے ہوئے لواحقین سے دلی ہمدردی و اظہار تعزیت کیا ہے۔
انہوں نے زخمی اہل کاروں کی جلد صحتیابی کے لیے دعا بھی کی۔
محسن نقوی نے کہا کہ پولیس اہلکاروں نے جان دے کر خوارجی دہشتگردوں کا حملہ ناکام بنایا۔ خیبرپختونخوا پولیس نے دہشتگردی کے خلاف جنگ میں لازوال قربانیاں دی ہیں۔ قوم خیبرپختونخوا پولیس کے بہادر سپوتوں کو سلام پیش کرتی ہے۔
