اسلام آباد:
ہائی کورٹ نے پنجاب اسمبلی کے حلقہ پی پی 73 سرگودھا میں ضمنی الیکشن روکنے کی درخواست پر فیصلہ محفوظ کرلیا ہے۔
ایکسپریس نیوز کے مطابق جسٹس خادم حسین سومرو نے پاسبان وطن پاکستان پارٹی کے سربراہ شیخ مختار کی درخواست پر فریقین کے دلائل مکمل ہونے کے بعد فیصلہ محفوظ کیا۔
درخواست گزار کے وکیل نے سماعت کے دوران مؤقف اختیار کیا کہ ان کے مؤکل ضمنی الیکشن میں حصہ لینا چاہتے تھے لیکن الیکشن کمیشن نے کاغذاتِ نامزدگی جمع کرنے کی اجازت نہیں دی۔ انہوں نے بتایا کہ ستمبر میں سیلاب کے باعث ضمنی الیکشن ملتوی ہوا تھا، تاہم نئے انتخابی شیڈول کے وقت ان کے مؤکل کو دوبارہ کاغذاتِ نامزدگی جمع نہیں کرنے دیے گئے۔
سماعت کے دوران جسٹس خادم حسین سومرو نے استفسار کیا کہ پی پی 73 کی نشست کیوں خالی ہوئی؟ جس پر الیکشن کمیشن کے وکیل نے بتایا کہ حلقے سے پی ٹی آئی کے رکن اسمبلی انصر اقبال ہرل کو نو مئی کیس میں سزا ہونے کے باعث نااہل قرار دیا گیا، جس کے بعد نشست خالی ہوئی۔
الیکشن کمیشن کے وکیل نے مؤقف اپنایا کہ ضمنی الیکشن کا شیڈول جاری ہوچکا ہے، انتخابی نشان الاٹ کیے جا چکے ہیں اور بیلٹ پیپرز بھی چھپ چکے ہیں۔ انتخابی عمل کے اس مرحلے پر ایک شخص کی درخواست پر انتخابات روکنا ممکن نہیں۔
انہوں نے مزید بتایا کہ پاسبان وطن پاکستان پارٹی 20 اکتوبر کو رجسٹرڈ ہوئی، اگر یہ پارٹی 13 اکتوبر تک رجسٹرڈ ہو جاتی تو امیدوار الیکشن میں حصہ لے سکتے تھے۔ وکیل کا کہنا تھا کہ اب یہ رک جائیں، اگلی بار الیکشن لڑ لیں، بیلٹ پیپرز کی لاگت بھی بہت زیادہ ہے، اس مرحلے پر الیکشن ملتوی کرنا مناسب نہیں۔
دونوں جانب سے دلائل مکمل ہونے کے بعد عدالت نے فیصلہ محفوظ کرلیا، جو بعد ازاں سنایا جائے گا۔
