ماہرینِ آثارِ قدیمہ نے قدیم مصر کے ایک مقبرے سے حنوط شدہ کتا دریافت کیا ہے جو ایک مرد اور عورت کی باقیات کے اوپر پڑا ہوا تھا۔ ماہرین کے مطابق تدفین کی یہ غیر معمولی ترتیب اس جانور کے انسانوں کے ساتھ کسی خاص تعلق کی جانب اشارہ کر سکتی ہے۔
یہ چیمبر تھیبن نیکروپولِس کا حصہ ہے، جو دریائے نیل کے دوسری جانب موجود قدیم شہر لکسر کے مقابل واقع ایک وسیع قبرستان ہے۔ اس علاقے میں سیکڑوں تدفینی مقامات موجود ہیں اور اسے کئی صدیوں تک تدفین کے لیے استعمال کیا جاتا رہا۔
تحقیق کے مطابق اس قبرستان میں مختلف ادوار کے دوران ایک ہی جگہ پر متعدد تدفینیں کی گئیں۔ بعد میں آنے والی نسلوں نے پہلے سے موجود قبروں اور تدفینی جگہوں میں دستیاب محدود گنجائش کے مطابق مزید لاشیں دفن کیں، جس کے نتیجے میں بعض مقامات پر انسانی باقیات ایک دوسرے کے اوپر موجود پائی گئیں۔
یہ قبرستان 700 سال سے زائد عرصے تک دوبارہ تدفین کے لیے استعمال ہوتا رہا۔
تاہم، ماہرین کی توجہ سب سے زیادہ اس حنوط شدہ کتے نے حاصل کی، جو ایک مرد اور عورت کی باقیات کے اوپر موجود تھا۔
محققین کا کہنا تھا کہ اس ترتیب سے اندازہ لگایا جا سکتا ہے کہ کتے کا اس جوڑے کے ساتھ کوئی خاص تعلق تھا یا ممکن ہے کہ اسے مرنے والوں کے لیے بعد از مرگ سفر میں رہنمائی کرنے والے جانور کے طور پر تصور کیا گیا ہو۔
اس تحقیق کے پہلے مصنف اور اسپین کی یونیورسٹی آف لا لگونا کے محقق ڈاکٹر جیرڈ کاربالو پیریز کے مطابق انسانی تدفین کے بالکل قریب کسی جانور کو رکھنا اس بات کی علامت ہو سکتا ہے کہ انسانوں اور جانور کے درمیان کوئی بامعنی یا خصوصی تعلق موجود تھا۔
ماہرین کے لیے یہ دریافت قدیم مصری معاشرے میں انسانوں اور جانوروں کے باہمی تعلق اور تدفینی رسومات کو سمجھنے کے حوالے سے اہم شواہد فراہم کر سکتی ہے۔
