عمان کے ساحل کے قریب ایک آئل ٹینکر نامعلوم پروجیکٹائل کی زد میں آگیا، جس کے نتیجے میں جہاز کے انجن روم کو نقصان پہنچا اور اس کی نقل و حرکت متاثر ہوئی۔
برطانیہ کی میری ٹائم ٹریڈ آپریشنز کے مطابق واقعہ عمان کے علاقے اش شیشہ سے تقریباً 9 ناٹیکل میل شمال مشرق میں پیش آیا۔ حکام نے واقعے کو بحری جہازوں کی سلامتی کے حوالے سے ایک اہم واقعہ قرار دیتے ہوئے متعلقہ فریقوں کو الرٹ جاری کیا۔
رپورٹ کے مطابق نامعلوم پروجیکٹائل آئل ٹینکر سے ٹکرایا، جس سے انجن روم کو نقصان پہنچا اور جہاز غیر فعال ہوگیا۔ بتایا گیا ہے کہ متاثرہ جہاز امریکی تحفظ میں مختص بحری راستے سے گزر رہا تھا۔
واقعے کے بعد جہاز پر موجود عملے کے تمام ارکان محفوظ رہے اور کسی جانی نقصان کی اطلاع نہیں ملی۔ تاہم فوری طور پر یہ واضح نہیں ہوسکا کہ واقعے کے نتیجے میں سمندر میں تیل یا کسی دوسرے مواد کے اخراج سے ماحولیاتی نقصان ہوا یا نہیں۔
یہ واقعہ آبنائے ہرمز اور عمان کے قریب تجارتی بحری جہازوں کو درپیش بڑھتے ہوئے سکیورٹی خطرات کے تناظر میں سامنے آیا ہے۔ 2026 کے دوران اس خطے میں متعدد تجارتی جہازوں، خصوصاً آئل ٹینکرز، کو مختلف حملوں اور پروجیکٹائل واقعات کا سامنا کرنا پڑا ہے۔
عمان کے قریب یہ واقعہ ایسے وقت میں پیش آیا ہے جب ایران اور امریکا کے درمیان جاری کشیدگی کے باعث آبنائے ہرمز اور اس کے اطراف میں بحری آمدورفت کو شدید سکیورٹی خدشات لاحق ہیں۔ آبنائے ہرمز عالمی تیل کی ترسیل کے لیے انتہائی اہم سمندری گزرگاہ ہے، اس لیے تجارتی جہازوں پر حملوں کے واقعات عالمی توانائی کی منڈی پر بھی اثرانداز ہوسکتے ہیں۔
