یو ایس اوپن فائنل کے دوران شائقین کی توجہ صرف ٹینس کے سنسنی خیز مقابلے پر نہیں رہی بلکہ ایک دلچسپ کیمرا موومنٹ نے بھی سب کو محظوظ کیا۔
فائنل کے اہم مرحلے کے دوران اسٹیڈیم کی گھڑی پر وقت 0:07 دکھائی دیا تو براڈکاسٹ کیمرہ فوراً حاضرین میں موجود معروف ہالی ووڈ اداکار پیئرس بروسنن کی جانب گھوم گیا۔
پیئرس بروسنن جیمز بانڈ کے کردار ’007‘ کے لیے دنیا بھر میں شہرت رکھتے ہیں۔
کیمرے کی بروقت حرکت نے گھڑی کے 0:07 اور سابق جیمز بانڈ کے درمیان ایسا خوبصورت تعلق پیدا کیا کہ سوشل میڈیا پر اس لمحے کی خوب پذیرائی ہوئی۔
یو ایس اوپن کی سوشل میڈیا ٹیم نے بھی ویڈیو شیئر کرتے ہوئے کیمرا آپریٹرز کی مہارت کو سراہا۔
شائقین نے بھی دلچسپ تبصرے کرتے ہوئے کیمرہ ڈائریکٹر اور آپریٹر کو انعام یا تنخواہ میں اضافے کا مستحق قرار دیا۔
واضح رہے کہ بروسنن نے چار فلموں، ’گولڈن آئی‘، ’ٹومارو نیور ڈائز‘، ’دی ورلڈ از ناٹ اینف‘ اور ’ڈائی این ادر ڈے‘ میں جیمز بانڈ کا کردار ادا کیا تھا۔
بانڈ کے بعد بھی ان کا فلمی سفر جاری ہے اور وہ اس وقت متعدد نئے منصوبوں کا حصہ ہیں۔
