آذربائیجان سے تعلق رکھنے والی 20 سالہ غیر ملکی لڑکی سے ڈیفنس سی میں مبینہ اجتماعی زیادتی کے مقدمے کی تفتیش میں اہم پیش رفت سامنے آئی ہے۔ پولیس نے مبینہ واردات میں استعمال ہونے والی سفید رنگ کی گاڑی تحویل میں لے لی جبکہ دو خواتین سمیت پانچ مبینہ ملزمان کی شناخت مکمل کرلی ہے۔
پولیس نے ملزمان کی گرفتاری کے لیے سی سی ڈی، آپریشنز اور انویسٹی گیشن ونگ کی ٹیمیں تشکیل دے کر مختلف علاقوں میں چھاپے مارنے شروع کر دیے۔
پولیس ذرائع کے مطابق مبینہ ملزمان نے غیر ملکی لڑکی کو ٹریپ کرکے اپنے ساتھ لے جانے کے لیے سفید رنگ کی گاڑی استعمال کی، جو مبینہ ملزم تنویر کی ملکیت ہے۔ پولیس نے گاڑی ایک مرکزی ملزم کے رشتہ دار کے گھر سے برآمد کرکے تھانہ ڈیفنس سی منتقل کردی ہے جہاں گاڑی کا فرانزک معائنہ سمیت دیگر شواہد اکٹھے کیے جا رہے ہیں۔
ذرائع کے مطابق پولیس نے ابتدائی طور پر مختلف کارروائیوں کے دوران 5 افراد کو حراست میں لیا ہے جن سے تفتیش جاری ہے۔ حراست میں لیے گئے افراد مبینہ ملزمان کے رشتہ دار بتائے جاتے ہیں۔ پولیس کے مطابق زیرحراست افراد سے ملنے والی معلومات اور دیگر شواہد کی روشنی میں مرکزی ملزمان تک پہنچنے کی کوشش کی جا رہی ہے۔
پولیس ذرائع کے مطابق کیس میں عمر، محسن اور تنویر سمیت دو خواتین کے نام بھی سامنے آئے ہیں، جن میں مسکان بھی شامل ہے، مسکان نے مبینہ طور پر غیر ملکی لڑکی کو فلیٹ تک پہنچایا تھا۔ دیگر مبینہ ملزمان اور ان سے متعلق افراد کے گھروں پر سندر کے علاقے میں نجی سوسائٹی، ڈیفنس سمیت مختلف شہروں اور دیگر علاقوں میں چھاپے مارے جا رہے ہیں جبکہ بعض ملزمان کے مبینہ طور پر فرار ہونے کی اطلاعات ہیں۔
پولیس نے مبینہ ملزمان کے نام اسٹاپ لسٹ میں بھی شامل کر دیے ہیں۔ تفتیشی ٹیمیں سی سی ٹی وی فوٹیج، گاڑی، موبائل فونز، سوشل میڈیا اکاؤنٹس، سفری دستاویزات اور دیگر ڈیجیٹل شواہد کا جائزہ لے رہی ہیں۔ پولیس ذرائع کے مطابق غیر ملکی خاتون کے مختلف افراد سے رابطوں اور پاکستان میں قیام سے متعلق معلومات بھی تفتیش کا حصہ بنائی گئی ہیں۔
پولیس کے مطابق متاثرہ 20 سالہ ڈیانا کا میڈیکل کروا لیا گیا ہے۔ خاتون کے بیان کو بھی تفتیش میں شامل کیا جائے گا۔ میڈیکل رپورٹ سے واقعے سے متعلق مزید حقائق سامنے آنے کی توقع ہے۔
دستاویزات کے مطابق ڈیانا مارچ سے مئی کے دوران دو مرتبہ پاکستان آچکی تھی جبکہ اب تیسری بار پاکستان آئی۔ ڈیانا کی تاریخ پیدائش 22 مئی 2004 اور پاسپورٹ نمبر C05405514 ہے وہ 4 مارچ کو فلائٹ نمبر HY461 کے ذریعے تاشقند سے علامہ اقبال انٹرنیشنل ایئرپورٹ پہنچی اور 20 مارچ کو فلائٹ نمبر J2146 کے ذریعے جاوید نامی شخص کے ساتھ باکو، آذربائیجان واپس گئی۔
دستاویزات کے مطابق ڈیانا 22 مئی کو دوسری بار فلائٹ نمبر PA469 کے ذریعے باکو سے پاکستان آئی، جبکہ پولیس ذرائع کے مطابق پندرہ روز قبل وہ تیسری بار لاہور آئی تھی۔
پولیس ذرائع کے مطابق غیر ملکی لڑکی کپڑے کے کاروبار کے سلسلے میں لاہور اور فیصل آباد آنا جانا کرتی تھی اور اچھی طرح اردو زبان سمجھ اور بول سکتی ہے۔
پولیس ذرائع کے مطابق واقعے کے مختلف پہلوؤں کا جائزہ لیا جا رہا ہے جبکہ خاتون کے لاہور میں قیام، مختلف مقامات پر آمدورفت اور رابطوں سے متعلق معلومات بھی اکٹھی کی جا رہی ہیں۔ پولیس نے پنجاب اسمبلی میں خاتون کی موجودگی سے متعلق سامنے آنے والی تصاویر اور اس کے سوشل میڈیا اکاؤنٹس کو بھی تفتیش کا حصہ بنا لیا ہے۔
دوسری جانب مقدمے میں متاثرہ غیر ملکی خاتون کو بیان ریکارڈ کرانے کے لیے 28 ستمبر کو متعلقہ علاقہ مجسٹریٹ کے روبرو پیش کرنے کا حکم دیا گیا ہے۔ ڈیوٹی مجسٹریٹ ارم یوسف کے روبرو پولیس نے خاتون کا ابتدائی بیان ضابطہ فوجداری کی دفعہ 164 کے تحت قلمبند کرنے کی استدعا کی۔ عدالت نے قرار دیا کہ عام تعطیل کے باعث ریمانڈ کے علاوہ دیگر فائلوں پر سماعت نہیں کی جا سکتی، اس لیے تفتیشی افسر متاثرہ خاتون کو 28 ستمبر کو متعلقہ علاقہ مجسٹریٹ کے سامنے پیش کرے۔
عدالت نے پولیس کو ہدایت کی کہ مبینہ ملزمان کی تلاش جاری رکھی جائے اور ملزمان کے ملنے پر انہیں نوٹس جاری کیا جائے۔ڈی آئی جی انویسٹی گیشن لاہور سید ذیشان رضا نے واقعے کا نوٹس لیتے ہوئے ایس پی انویسٹی گیشن کینٹ عاصم افتخار کی سربراہی میں ٹیمیں تشکیل دی ہیں۔ ڈی آئی جی آپریشنز لاہور محمد فیصل کامران کے مطابق واقعے میں ملوث ملزمان کی شناخت ہوچکی ہے، پولیس ان تک پہنچ چکی ہے اور ان کی گرفتاری کے لیے چھاپے جاری ہیں، ملزمان کو جلد قانون کے کٹہرے میں لایا جائے گا۔
