مقبوضہ مغربی کنارے کے شہر الخلیل میں دو اسرائیلی فوجیوں کی ہلاکت کے بعد اسرائیلی فوج نے بڑے پیمانے پر فوجی آپریشن شروع کردیا۔
عالمی میڈیا رپورٹس کے مطابق 23 اکتوبر کو الخلیل کے قریب ایک فوجی چیک پوسٹ پر فائرنگ کے نتیجے میں 2 اسرائیلی فوجی ہلاک جبکہ3 افراد زخمی ہوگئے تھے۔
اسرائیلی فوج نے جوابی کارروائی میں فائرنگ کرنے والے دونوں فلسطینی مسلح افراد کو ہلاک کرنے کا دعویٰ کیا۔
اس واقعے کے بعد اسرائیلی دفاعی افواج، داخلی سکیورٹی ادارے شن بیت اور سرحدی پولیس نے مشترکہ کارروائیاں شروع کیں۔
اسرائیلی حکام کے مطابق آپریشن کا مقصد مشتبہ افراد کی تلاش، اسلحے کی برآمدگی اور مبینہ عسکری ڈھانچے کو ختم کرنا ہے۔ کارروائی کئی روز تک جاری رہنے کا امکان ہے۔
رپورٹس کے مطابق الخلیل اور اس کے اطراف میں نقل و حرکت پر پابندیاں عائد کی گئی ہیں جبکہ متعدد مقامات پر سکیورٹی چیکنگ سخت کردی گئی ہے۔
فلسطینی حکام اور مقامی ذرائع کے مطابق فوجی کارروائی کے باعث سیکڑوں خاندان متاثر ہوئے ہیں۔
24 اکتوبر کی رپورٹس میں تقریباً 1,200 سے 1,500 فلسطینیوں کے اپنے گھروں سے بے گھر ہونے کی اطلاعات سامنے آئیں۔ بعض علاقوں میں عمارتوں کو مسمار کرنے کی کارروائیاں بھی رپورٹ کی گئی ہیں۔
اسرائیلی وزیراعظم بنجمن نیتن یاہو نے حملہ آوروں کے محلے کے خلاف سخت کارروائی کا اعلان کرتے ہوئے مغربی کنارے میں مزید وسیع آپریشن کی تیاری کی ہدایت دی ہے۔
دوسری جانب فلسطینی حکام نے شہریوں کی نقل مکانی اور املاک کی تباہی پر تشویش کا اظہار کیا ہے۔ خطے میں تازہ کارروائیوں کے بعد کشیدگی مزید بڑھنے کا خدشہ ہے۔
