آسٹریلیا اور جنوبی افریقا کے درمیان ٹیسٹ سیریز کے فیصلہ کن مقابلے سے قبل کینگروز کو اسٹیو اسمتھ کی فٹنس کے حوالے سے تشویش کا سامنا ہے جبکہ نِک میڈنسن کو ٹیم سے باہر کردیا گیا ہے۔
اسٹیو اسمتھ گردن کی تکلیف سے پریشان ہیں اور ان کی دستیابی کا فیصلہ مکمل نیٹ سیشن میں فٹنس جانچنے کے بعد کیا جائے گا۔
آسٹریلوی ہیڈ کوچ اینڈریو میکڈونلڈ کے مطابق اسمتھ کی واپسی کے امکانات کا اندازہ لگانا فی الحال مشکل ہے۔
دوسری جانب میڈنسن سیریز کی چار اننگز میں صرف 56 رنز بنا سکے جس کے بعد ان کی جگہ میٹ رینشا کی ٹریوس ہیڈ کے ساتھ اننگز کا آغاز کرنے کی توقع ہے۔
میڈنسن شیفیلڈ شیلڈ کے آئندہ میچ کے لیے آسٹریلیا واپس روانہ ہوں گے۔
وکٹ کیپر سیم ہارپر بھی دورہ چھوڑ کر وطن واپس جا رہے ہیں تاکہ وکٹوریہ کی جانب سے شیفیلڈ شیلڈ میچ کھیل سکیں۔
انگلی کی انجری سے صحت یاب ہونے والے جوش انگلس کو وکٹ کیپنگ کے لیے فٹ قرار دے دیا گیا ہے۔
اگر اسٹیو اسمتھ فیصلہ کن ٹیسٹ میں شرکت نہ کرسکے تو مارنس لبوشین کو ٹیم میں برقرار رکھے جانے کا امکان ہے۔
سلیکٹرز ان کی حالیہ کارکردگی پر غور کر رہے ہیں تاہم چیئرمین سلیکٹرز جارج بیلی نے واضح کیا ہے کہ میڈنسن کا اخراج ان کے ٹیسٹ کیریئر کا اختتام نہیں ہے۔
