تہران: ایران کی پاسدارانِ انقلاب نے دعویٰ کیا ہے کہ آبنائے ہرمز کے قریب ممنوع قرار دیے گئے سمندری راستے سے گزرنے کی کوشش کے دوران چار آئل ٹینکرز بحری بارودی سرنگوں سے ٹکرا کر تباہ ہوگئے اور ان میں آگ بھڑک اٹھی۔
خبر رساں ادارے رائٹرز کے مطابق پاسدارانِ انقلاب نے اپنے بیان میں کہا کہ چاروں ٹینکرز تاحال شعلوں کی لپیٹ میں ہیں۔ بیان میں مزید دعویٰ کیا گیا کہ ایرانی فورسز نے دو دیگر بحری جہازوں کو بھی قبضے میں لے لیا ہے۔
پاسدارانِ انقلاب کے مطابق متاثرہ ٹینکرز اس سمندری راستے سے گزرنے کی کوشش کر رہے تھے جسے آبنائے ہرمز کے جنوب میں ممنوع قرار دیا گیا تھا۔ ایرانی فورسز نے دعویٰ کیا کہ جہازوں کے بحری بارودی سرنگوں سے ٹکرانے کے بعد انہیں نقصان پہنچا۔
آبنائے ہرمز عالمی سطح پر تیل کی ترسیل کے اہم ترین سمندری راستوں میں شمار ہوتی ہے، اس لیے اس کے قریب پیش آنے والے اس واقعے سے بحری آمدورفت اور تیل کی عالمی سپلائی کے حوالے سے خدشات بڑھ سکتے ہیں۔
تاہم ٹینکرز کی شناخت، ان کے عملے کی صورت حال اور واقعے میں ہونے والے ممکنہ جانی نقصان سے متعلق مزید تفصیلات سامنے نہیں آئیں۔ پاسدارانِ انقلاب کے دعوؤں کی آزادانہ تصدیق بھی تاحال نہیں ہوئی۔
