بنگلادیش نے توحید ہردوئے کی چوتھی اننگز میں 82 رنز کی عمدہ بیٹنگ کی بدولت ویسٹ انڈیز کے خلاف سلہٹ ٹیسٹ ڈرا کرلیا، تاہم مہمان ٹیم نے میرپور ٹیسٹ میں 8 وکٹوں کی کامیابی کے باعث دو میچز کی سیریز 0-1 سے اپنے نام کرلی۔
خراب روشنی کے باعث امپائرز نے مقامی وقت کے مطابق سہ پہر 3 بج کر 45 منٹ پر کھیل ختم کرنے کا فیصلہ کیا، جبکہ میچ کا باضابطہ اختتام شام 4 بجے ہوا۔ مئی 2022 کے بعد بنگلادیش میں یہ پہلا ٹیسٹ میچ ڈرا ہوا ہے۔ اس دوران بنگلادیش نے مسلسل 18 ٹیسٹ میچز میں کسی نتیجے کے بغیر اختتام نہیں دیکھا تھا۔
ویسٹ انڈیز نے بنگلادیش میں اپنی برتری برقرار رکھتے ہوئے 2021 کے بعد مسلسل دوسری ٹیسٹ سیریز جیتی۔ مہمان ٹیم نے ورلڈ ٹیسٹ چیمپیئن شپ کا سائیکل بھی کامیابی کے ساتھ مکمل کیا۔ دوسری جانب بنگلادیش کو 15 نومبر سے جوہانسبرگ میں شروع ہونے والے ٹیسٹ کی تیاری کے لیے صرف پانچ دن ملیں گے۔
سلہٹ ٹیسٹ میں توحید ہردوئے کی ناقابلِ شکست 242 رنز کی اننگز بھی نمایاں رہی، جس نے بنگلادیش کو بڑی شرمندگی سے بچایا۔ وہ ٹیسٹ میچ میں مجموعی طور پر 300 سے زائد رنز بنانے والے پہلے بنگلادیشی بیٹر بن گئے۔ اس سے قبل یہ ریکارڈ مومن الحق کے پاس تھا، جنہوں نے 2018 میں سری لنکا کے خلاف ایک ٹیسٹ میں 281 رنز بنائے تھے۔
توحید ہردوئے ویسٹ انڈیز کے خلاف ایک ٹیسٹ میچ میں 300 سے زائد رنز بنانے والے دنیا کے نویں بیٹر بھی بن گئے۔
