نزلہ، زکام اور کھانسی میں شہد اور ادرک کے گھریلو مشروبات کتنے مفید ہیں؟

شہد، کالی مرچ، ادرک اور لیموں کو روایتی طور پر نزلہ زکام کے گھریلو نسخوں میں شامل کیا جاتا ہے


ویب ڈیسک November 21, 2026

موسم سرد ہوتے ہی نزلہ، زکام، کھانسی اور گلے کی خراش جیسے مسائل عام ہوجاتے ہیں۔ وائرل انفیکشن کی وجہ سے ہونے والی یہ تکالیف روزمرہ معمولات کو متاثر کرتی ہیں اور بعض افراد فوری آرام کے لیے ادویات کا سہارا لیتے ہیں۔ تاہم گھریلو سطح پر بھی کچھ ایسے اجزا استعمال کیے جاتے ہیں جو گلے کی خراش اور کھانسی میں وقتی سکون فراہم کرسکتے ہیں۔

شہد، کالی مرچ، ادرک اور لیموں کو روایتی طور پر نزلہ زکام کے گھریلو نسخوں میں شامل کیا جاتا ہے۔ ان اجزا میں بعض ایسے قدرتی مرکبات پائے جاتے ہیں جو مجموعی صحت کے لیے مفید ہوسکتے ہیں، تاہم یہ بات ذہن میں رکھنا ضروری ہے کہ ان سے وائرل انفیکشن فوری ختم ہونے کے شواہد موجود نہیں۔

شہد اور کالی مرچ کا آمیزہ

شہد کو کھانسی اور گلے کی خراش میں وقتی آرام پہنچانے کے لیے استعمال کیا جاتا ہے، جبکہ کالی مرچ کو روایتی طور پر سردی کے اثرات کم کرنے والے جزو کے طور پر دیکھا جاتا ہے۔ یہ گھریلو آمیزہ تیار کرنے کے لیے ایک چمچ نیم گرم شہد میں تھوڑی سی پسی ہوئی کالی مرچ شامل کرکے استعمال کیا جاتا ہے۔ شہد گلے کو سکون پہنچا سکتا ہے۔

ادرک، شہد، کالی مرچ اور لیموں کا مشروب

دوسرا گھریلو طریقہ ادرک، شہد، کالی مرچ اور لیموں کو یکجا کرکے استعمال کرنا ہے۔ اس کی تیاری کے لیے باریک پسی ہوئی ادرک، ایک چائے کا چمچ شہد، تھوڑی سی پسی ہوئی کالی مرچ اور ایک چمچ لیموں کا رس اچھی طرح ملا لیا جاتا ہے۔ اصل گھریلو نسخے میں اس آمیزے کے دو چمچ روزانہ استعمال کرنے کا مشورہ دیا جاتا ہے۔

ادرک میں ایسے قدرتی مرکبات موجود ہوتے ہیں جن میں سوزش کم کرنے کی خصوصیات پائی جاتی ہیں، جبکہ لیموں وٹامن سی فراہم کرتا ہے۔ شہد کھانسی میں وقتی سکون دے سکتا ہے۔

نزلہ زکام کی صورت میں مناسب آرام، پانی اور دیگر مشروبات کا استعمال اہم ہے۔ اگر بخار برقرار رہے، سانس لینے میں دشواری ہو یا علامات شدید ہوجائیں تو ڈاکٹر سے رجوع کرنا چاہیے۔ ایک سال سے کم عمر بچوں کو شہد نہیں دینا چاہیے۔