اعظم خان کی دھواں دار بیٹنگ، یو اے ای بلز نے مسلسل دوسری بار ابوظہبی ٹی 10 ٹائٹل جیت لیا

ٹام مورز نے 20 گیندوں پر ناقابل شکست 48 رنز کی مزاحمتی اننگز کھیلی تاہم وہ ٹیم کو فتح نہ دلا سکے


اسپورٹس ڈیسک November 21, 2026

پاکستان کے جارح مزاج وکٹ کیپر بیٹر اعظم خان کی برق رفتار بیٹنگ کی بدولت یو اے ای بلز نے ابوظہبی ٹی 10 لیگ 2026 کا فائنل جیت کر مسلسل دوسری مرتبہ چیمپئن بننے کا اعزاز حاصل کرلیا۔

زید کرکٹ اسٹیڈیم میں کھیلے گئے فائنل میں یو اے ای بلز نے یاس لائنز کو 24 رنز سے شکست دی۔ اعظم خان نے صرف 22 گیندوں پر 52 رنز کی دھواں دار اننگز کھیلی جس میں 3 چوکے اور 6 بلند و بالا چھکے شامل تھے۔ ان کا اسٹرائیک ریٹ 236 رہا۔

 

بلز نے پہلے بیٹنگ کرتے ہوئے مقررہ 10 اوورز میں 134 رنز بنائے۔ آندرے فلیچر نے 23 رنز اسکور کیے جبکہ کپتان کیرون پولارڈ نے 17 گیندوں پر 37 رنز کی اہم اننگز کھیلی۔ شاداب خان نے صرف 4 گیندوں پر ناقابل شکست 14 رنز بناکر ٹیم کا مجموعہ مزید بہتر کیا۔

135 رنز کے ہدف کے تعاقب میں یاس لائنز کی ٹیم مقررہ اوورز میں 4 وکٹوں کے نقصان پر 110 رنز بنا سکی۔ ٹام مورز نے 20 گیندوں پر ناقابل شکست 48 رنز کی مزاحمتی اننگز کھیلی تاہم وہ ٹیم کو فتح نہ دلا سکے۔

گروپ مرحلے میں تیسری پوزیشن حاصل کرنے والی یو اے ای بلز نے شاندار کھیل پیش کرتے ہوئے ایک بار پھر ٹائٹل اپنے نام کرلیا۔