کمزور بولنگ کے سامنے کامران بھی جوش میں آگئے

قومی ٹی 20 ایونٹ کے میچ میں 70 کی اننگز، لاہور نے ڈیرہ مرادجمالی کو 122 رنز سے ہرا دیا، ایبٹ آباد اور اسلام آباد بھی فتحیاب۔ فوٹو : اے ایف پی

---

قومی ٹی 20 کرکٹ ٹورنامنٹ میں لاہور لائنز نے دفاعی مہم کی ابتدا میں ڈیرہ مراد جمالی کو122 رنز سے ہرا دیا، کمزور بولنگ کے سامنے کامران اکمل بھی جوش میں آگئے، انھوں نے40 گیندوں پر 70 کی برق رفتار اننگزکھیلی،178کا تعاقب کرنے والی حریف ٹیم55 پر ڈھیر ہوگئی۔

ایبٹ آباد فالکنز نے بہاولپور اسٹیگزکو 52رنز سے قابو کرلیا، اسلام آباد لیپرڈز نے آزاد جموں و کشمیر جیگوارز کو 34 رنز سے ہرایا۔ تفصیلات کے مطابق قومی ٹی 20 کرکٹ ٹورنامنٹ میں گروپ 'سی' اور 'ڈی ' کے میچز کا آغاز ہوگیا، دفاعی چیمپئن لاہور لائنز نے ڈیرہ مراد جمالی کو122رنز کے بڑے مارجن سے پچھاڑ دیا، فاتح ٹیم نے 4 وکٹ پر177رنز جوڑے، کامران اکمل نے40 گیندوں پر 70 رنز بٹورے، ان کی اننگز میں 12چوکے اور1چھکا شامل رہا، امام الحق38 اور عابد علی 36 رنز کے ساتھ نمایاں رہے، شبیرعلی نے 2 وکٹیں لیں،ٹاس جیت کر بولنگ کا فیصلہ کرنے والی ناکام سائیڈ14اوورز میں55 رنزپرڈھیرہوگئی۔

نجیب اللہ (22) اور عابدعلی (12) ہی انفرادی اسکورکودہرے ہندسے میں پہنچا پائے، اظہرعلی نے3 پلیئرز کو پویلین چلتا کیا، آفتاب احمد نے اتنی ہی وکٹیں 15 کے عوض اپنے نام کیں۔ایبٹ آباد فالکنز نے بہاولپور اسٹیگزکو 52 رنز سے قابو کرلیا، ٹاس جیت کر فالکنز نے 5 وکٹ پر 174رنز جوڑے، فخرزمان60،کامران غلام 36، یاسر حمید 35 اور عدنان رئیس23رنز بنانے میں کامیاب رہے، مدثر اور حامدعلی نے2،2 شکارکیے۔

اسٹیگز 9 وکٹیں گنوا کر 122 رنز ہی بنا سکے، کامران حسین نے30 گیندوں پر46رنز ناٹ آؤٹ بنائے، اوپنر نعیم الدین کے27 رنزبھی نمایاں رہے، احمد جمال نے 3 جبکہ فضل ربی اور شکیل احمد نے 2،2 کھلاڑیوں کو پویلین چلتا کیا۔ اسلام آباد لیپرڈز نے آزاد جموں و کشمیر جیگوارز کو 34رنز سے ہرادیا، فاتح الیون نے 5 وکٹ پر 149رنز اسکور کیے، زوہیب احمد 46 اور نعیم انجم 13 پر ناٹ آؤٹ رہے، عماد وسیم نے27رنز بنائے، نقاش بشارت اور ارسلان عارف نے 2،2 وکٹیں لیں، ناکام الیون 19 اوورز میں 115رنز پر حوصلہ ہاربیٹھی، حسن رضا جونیئر 28 رنز بناکر نمایاں رہے، شہزاد اعظم اور رضا حسن نے 3،3 پلیئرز کوپویلین چلتا کیا۔